విమాన ప్రమాద ఘటనల నియంత్రణకు కేంద్ర పౌర విమానయాన డైరెక్టరేట్ జనరల్ (డీజీసీఏ) చర్యలు చేపట్టింది. రన్వే, ట్యాక్సీవేపై విమానాలు అదుపుతప్పిన ఘటనలు ఇటీవలి కాలంలో తరచూ జరుగుతున్న తరుణంలో 12 మంది పైలట్లను తాత్కాలికంగా విధుల నుంచి తొలగించింది. షోకాజ్ నోటీసులు జారీ చేసింది.
ఈ మధ్య కాలంలో స్పైస్‌ జెట్‌ విమానాలు మూడు సార్లు, ఎయిర్ ఇండియా ఎక్స్ప్రెస్ రెండు సార్లు, గో ఎయిర్ విమానం ఒకసారి రన్వే పై అదుపుతప్పాయి.
జైపూర్‌ నుంచి వచ్చిన స్పైస్‌ జెట్‌ విమానం భారీ వర్షాల నడుమ ముంబయి విమానాశ్రయం ప్రధాన రన్వేపై అదుపుతప్పింది. పక్కనే ఉన్న గడ్డిలో చిక్కుకుపోయింది. ఫలితంగా ముంబయి ఎయిర్‌పోర్టులోని ప్రధాన రన్వే ఇంకా తెరుచుకోలేదు.
జూన్ 30న జరిగిన మరో ఘటనలో భోపాల్‌ నుంచి సూరత్‌ వెళ్లిన విమానం భారీ వర్షం, గాలులతో రన్వేపై నుంచి జారింది. అదే రోజు మంగళూరులో ఎయిర్ ఇండియా ఎక్స్ప్రెస్, రాంచీలో గో ఎయిర్ విమానానికి ల్యాండ్ అయ్యే సమయంలో ఇబ్బంది ఎదురైంది.
జులై 2న కోల్‌కతా విమానాశ్రయంలో.. ల్యాండింగ్ సమయంలో స్పైస్‌ జెట్‌ విమానం నాలుగు లైట్లు ధ్వంసం అయ్యాయి. అదే రోజున దమన్‌ నుంచి కాలికట్‌ చేరుకున్న ఎయిర్ ఇండియా ఎక్స్ప్రెస్ అదుపుతప్పింది.
ఈ నేపథ్యంలో డీజీసీఏ నిబంధనల మేరకు ఆయా పైలట్లను పక్కన పెట్టినట్లు సదరు విమానయాన సంస్థలు వెల్లడించాయి.
ఇదీ చూడండి: పద్దు-19: కోట్లాది ప్రజల ఆకాంక్షల నడుమ నేడే బడ్జెట్
