కరోనా ప్రభావంతో విదేశాల్లో చిక్కుకుపోయిన భారతీయులను స్వదేశానికి తీసుకువచ్చేందుకు విదేశాంగ మంత్రిత్వ శాఖ ఏర్పాట్లను ముమ్మరం చేస్తోంది. ఈ మేరకు కేంద్రం ఒక విధాన నిర్ణయం తీసుకుంది. భారతీయులను తీసుకొచ్చేందుకు ఎయిర్‌ ఇండియా, వాయుసేన, నౌకాదళ సేవలు వినియోగించుకోనున్న కేంద్రం.. ఆయా దేశాల్లో ఎంత మంది ఉన్నారో తెలుసుకునేందుకు ప్రత్యేక రిజిస్ట్రేషన్ కార్యక్రమాన్ని చేపట్టింది.
ప్రత్యేక పోర్టల్ ద్వారా..
ఈ మేరకు భారత రాయబార కార్యాలయాలకు ఆదేశాలు జారీ చేసిన విదేశాంగ శాఖ.. ఆయా దేశాల్లో ఉన్నవారి వివరాలను సేకరించాలని పేర్కొంది. ఏ దేశంలో ఎంతమంది ఉన్నారో, వారు ఏయే ప్రాంతాల్లో ఉన్నారో తేల్చాలని సూచించింది. తద్వారా అక్కడి పరిస్థితులను అంచనా వేయడానికి అవకాశముంటుందని భావించింది. ఇందుకోసం ఆయా దేశాలలోని భారతీయ రాయబార కార్యాలయాల ద్వారా ఓ ప్రత్యేక పోర్టల్ను ఏర్పాటుచేసింది కేంద్రం. దీని ద్వారా భారత్కు రావాలనుకున్న వారి వివరాలు సేకరించి.. తగిన ప్రణాళికలను సిద్ధం చేయచేయనుంది. దేశానికి రావాలనుకున్నవారు పోర్టల్లో రిజిస్ట్రేషన్ చేయించుకుని.. వివరాలు నమోదు చేసుకోవాలని అధికారులు పేర్కొన్నారు.
యూఏఈ నుంచి మొదలు..
భారతీయులు అధికంగా ఉన్న దుబాయ్‌ సహా.. గల్ఫ్‌ దేశాల్లో చిక్కుకున్న వారికోసం ప్రత్యేక దృష్టి పెట్టినట్లు విదేశాంగ శాఖ అధికారులు వెల్లడించారు. తొలుత యునైటెడ్ అరబ్ ఎమిరేట్స్(యూఏఈ) నుంచి వివరాల సేకరణ ప్రారంభించిన కేంద్రం.. ఆయా దేశాల్లోని పరిస్థితుల ఆధారంగా నిర్ణయం తీసుకోనున్నారు. వీలైనంతవరకు ఎక్కువ మందిని సముద్ర మార్గం ద్వారానే తరలించే యోచనలో కేంద్రం ఉన్నట్లు తెలుస్తోంది.
ఇదీ చదవండి: విదేశాల్లోని భారతీయుల కోసం కేంద్రం 'మెగాప్లాన్'
