భారత్లో కరోనా కేసుల సంఖ్య సోమవారం భారీగా పెరిగింది. ఒక్కరోజే 227 కేసులు నమోదుకాగా.. మొత్తం ఆ సంఖ్య 1251కి చేరింది. ఒక్కరోజులోనే దేశంలో ఇంత మొత్తంలో కేసుల సంఖ్య పెరగడం ఇదే తొలిసారి. ఇప్పటివరకు 32 మంది మరణించారు. మరో 101 మంది కోలుకున్నారని.. ఒకరు దేశం విడిచివెళ్లడం వల్ల ప్రస్తుతం మరో 1117 ఆక్టివ్ కేసులున్నాయని కేంద్ర ఆరోగ్య శాఖ స్పష్టం చేసింది.
కేరళలో గరిష్ఠంగా 202 మందికి వైరస్ సోకినట్లు ధ్రువీకరించారు అధికారులు. ఆ తర్వాతి స్థానాల్లో మహారాష్ట్ర(198), దిల్లీ (87) ఉన్నాయి. కర్ణాటకలో 83, ఉత్తర్ప్రదేశ్లో 82 మంది వైరస్ బారిన పడ్డారు.
మహారాష్ట్రలో అత్యధికంగా 8 మంది కొవిడ్ ధాటికి ప్రాణాలు విడిచారు. గుజరాత్లో 6, కర్ణాటక, మధ్యప్రదేశ్లలో 3 చొప్పున, దిల్లీ, జమ్ము కశ్మీర్లలో ఇద్దరు చొప్పున మృతి చెందారు. తెలంగాణలో ఆరుగురు చనిపోయినట్లు అక్కడి అధికారులు పేర్కొంటున్నారు.
ఇక్కడ తక్కువే...
ప్రపంచదేశాల్లో మరణమృదంగం మోగిస్తున్న కొవిడ్-19 భారతదేశంలో మాత్రం సామూహిక సంక్రమణ స్థాయికి చేరలేదని.. అది స్థానిక సంక్రమణ దశలోనే ఉందని కేంద్ర ఆరోగ్యశాఖ తెలిపింది. దేశవ్యాప్తంగా 100 కేసుల నుంచి వెయ్యి కేసులకు చేరుకోవడానికి 12 రోజుల వ్యవధి పట్టడాన్ని బట్టే ఈ విషయం అర్థమవుతోందని పేర్కొంది. అభివృద్ది చెందిన 7 దేశాలతో పోల్చితే భారత్లో కరోనా విస్తృతి తక్కువేనని చెప్పింది.
