కరోనా కాలంలోనూ 14 నెలల పాపతో పోలీసు విధుల్లోకి!

ప్రస్తుతం దేశవ్యాప్తంగా లాక్​డౌన్​ అమల్లో ఉంది. అత్యవసర సిబ్బంది, పోలీసులు, వైద్యులు, మీడియా మినహా మిగతా వారికి బయటతిరిగేందుకు అవకాశమే లేదు. అయితే.. ఈ సమయంలోనూ 14 నెలల తన పాపతో కలిసి విధులు నిర్వర్తిస్తోంది గుజరాత్​కు చెందిన మహిళా పోలీసు.

కరోనా నివారణ చర్యగా కేంద్రం తీసుకొచ్చిన లాక్​డౌన్​ నిబంధనను మొదటినుంచీ దగ్గరుండి పర్యవేక్షిస్తున్నారు పోలీసులు. రాత్రి, పగలూ తేడా లేకుండా విధులకు అంకితమయ్యారు. అయితే.. ఈ సమయంలో తన 14 నెలల పాపతో కలిసి విధులు నిర్వర్తిస్తోంది గుజరాత్​ కచ్​లోని ఓ మహిళా కానిస్టేబుల్​.

ప్రస్తుత లాక్​డౌన్​ సమయంలో శాంతి భద్రతలను పర్యవేక్షిస్తూ.. భౌతిక దూరం ప్రాధాన్యాన్ని వివరిస్తోంది అల్కాబెన్​ దేశాయ్​. ఇందులో ప్రత్యేకత ఏమీ లేదని, తన బాధ్యత తాను చేస్తున్నట్లు చెప్పింది.

'' నా భర్త విధుల్లో ఉన్నారు. పాపను చూసుకోవడానికి ఇంట్లో ఎవరూ లేరు. అందుకే నాతో పాటే తీసుకొస్తున్నాను.''

-అల్కాబెన్​ దేశాయ్​, పోలీసు కానిస్టేబుల్​

త్రివేది చొరవతో...

అయితే.. పెట్రోలింగ్​ సమయంలో ఆ మహిళా పోలీసును గమనించిన ఐజీపీ సుభాష్​ త్రివేది, ఆమెకు మరింత సౌకర్యవంతమైన విధులు కేటాయించాలని సంబంధిత అధికారులను ఆదేశించారు.

'జనసమూహం నడుమ విధులతో.. ఆమెతో పాటు, తన కూతురికీ ప్రమాదం ఉన్నందున సురక్షిత వాతావరణం ఉన్నచోట విధులు కేటాయించాలని ఆదేశించాను' అని ఈటీవీ భారత్​తో చెప్పుకొచ్చారు త్రివేది.

కరోనా తీవ్రత చిన్నపిల్లల్లో అధికంగా ఉంటుందని అధ్యయనాలు చెబుతున్న వేళ.. ఆ పోలీసు తన 14 నెలల పాపను రోజూ బయటకు తీసుకొస్తుండటం గమనార్హం.