బిహార్ ఎన్నికల వేడి రాజుకున్న వేళ.. భారతీయ జనతా పార్టీని ఓ అంతర్గత సర్వే పునరాలోచనలో పడేసింది. మిత్రపక్షం జేడీయూ అధినేత నితీశ్ కుమార్ ప్రజాదరణ రోజురోజుకీ క్షీణిస్తోందని తేలడం వల్ల భాజపా సందిగ్ధంలో పడింది. ఈ నేపథ్యంలో ప్రధాని నరేంద్ర మోదీ ముఖచిత్రాన్నే ముందుపెట్టుకొని ప్రచారాలను హోరెత్తించాలని నిర్ణయానికొచ్చింది.
గందరగోళంలో భాజపా
ఇప్పటికే బలమైన మిత్రపక్షంగా ఉన్న జేడీయూకే పూర్తి సహకారం అందించాలా..? లేదంటే ఎన్డీఏలో భాగంగా ఉన్న లోక్ జనశక్తి పార్టీకి మద్దతు తెలపాలా..? అనే గందరగోళంలో ఉంది భాజపా. ప్రతిపక్షాలపై పోరాటం చేయాల్సిన దశలో ఎన్డీఏలోనే అంతర్గత ఘర్షణ రావటం వల్ల అప్రమత్తమైన భాజపా హైకమాండ్.. క్షేత్రస్థాయి కార్యకర్తలకు కీలక సూచనలు చేసింది. ఎన్డీఏ అభ్యర్థులను గెలిపించటమే లక్ష్యంగా పనిచేయాలని వారికి ఆదేశాలు జారీ చేసింది.
అంతర్గత సర్వేలో నితీశ్ కుమార్ ప్రభుత్వంపై వ్యతిరేకత ఎక్కువగా ఉందని తేలటం వల్ల బిహార్లో తమ విజయావకాశాలకు గండి పడుతుందని ఆందోళన చెందుతోంది భాజపా. ఈ నేపథ్యంలోనే బిహార్లో పలు ప్రాజెక్టులకు శ్రీకారం చుట్టారు మోదీ. త్వరలోనే రాష్ట్రానికి భారీ ప్యాకేజీ ప్రకటించే అవకాశం ఉందని పరిశీలకులు అభిప్రాయపడుతున్నారు.
ప్రచారంలో జోరు..
బిహార్ ప్రచార గోదాలో.. వర్చువల్ ర్యాలీలతో భాజపా అందరికంటే ముందుంది. భాజపా శ్రేణులు ఇప్పటికే తమ ప్రచారాన్ని మండల స్థాయికి తీసుకెళ్లారు. కరోనా సంబంధించిన పనుల్లో చురుగ్గా పని చేస్తున్నారు. కరోనా కట్టడితో పాటు ఇతర అంశాలపై కేంద్ర స్థాయిలో మోదీ సర్కార్ చేస్తున్న కృషి గురించి ప్రజలకు వివరిస్తున్నారు.
ఇప్పటికే 90మందితో కూడిన బృందాన్ని భాజపా ఏర్పాటు చేసుకుని ఈ అంతర్గత సర్వే నిర్వహించింది. బిహార్లో కొవిడ్ విజృంభణ, వలస కూలీల వెతలు, వరదలు వంటివి నితీశ్ ఛరిష్మాను తగ్గించినట్లుగా ఈ సర్వే తేల్చింది. అలాగే, నితీశ్ కుమార్ అవకాశవాద పొత్తుల పట్ల కూడా ప్రజలు ఆగ్రహంగా ఉన్నట్లు తెలిసింది..
ఈ సర్వే నేపథ్యంలేనే.. ప్రధాని మోదీని ప్రచారాస్త్రంగా వాడుకోవాలని నిర్ణయించింది భాజపా. కేంద్ర ప్రభుత్వ విజయాలను ప్రజల్లోకి తీసుకెళ్లి.. సుశాంత్ సింగ్ రాజ్పుత్ ఆత్మహత్యకు సంబంధించి ప్రజల్లో సానుభూతి పొందాలని చూస్తోంది. ఈ కోణంలోనే ప్రచార బాధ్యతలను మహారాష్ట్ర మాజీ ముఖ్యమంత్రి దేవేంద్ర ఫఢణవీస్కు అప్పగించినట్లు తెలుస్తోంది.
ఇదీ చూడండి: ఎన్నికల రణక్షేత్రంలో 'బిహార్ కా షేర్' ఎవరు?
