కేంద్ర మంత్రి రాంవిలాస్ పాసవాన్ మృతితో బిహార్లో ఖాళీ అయిన రాజ్యసభ స్థానానికి తమ అభ్యర్థిగా సుశీల్ కుమార్ మోదీని ఎంపిక చేసింది భారతీయ జనతా పార్టీ. ఒకవేళ విపక్ష ఆర్జేడీ తమ అభ్యర్థిని బరిలోకి దించితే డిసెంబర్ 14న ఈ రాజ్యసభ స్థానానికి ఉపఎన్నిక జరగనుంది. రాష్ట్ర అసెంబ్లీలో భాజపా నేతృత్వంలోని ఎన్డీఏకు మెజార్టీ ఉన్న నేపథ్యంలో సుశీల్ ఎన్నిక లాంఛనమేనని తెలుస్తోంది.
ఇదివరకు ఈ స్థానానికి ఎన్డీఏ కూటమి తరపున లోక్జనశక్తి పార్టీ వ్యవస్థాపకులు, దివంగత కేంద్ర మంత్రి రాంవిలాస్ పాసవాన్ ప్రాతినిథ్యం వహించారు. ఆయన మృతి చెందడం, అనంతరం ఎన్డీఏ నుంచి ఎల్జేపీ బయటకు రావడం వల్ల ఈ స్థానాన్ని సొంత పార్టీ నేతకే కేటాయించింది భాజపా.
ఎన్డీఏ అధికారంలో ఉన్నప్పుడు బిహార్ ఉపముఖ్యమంత్రిగా సుశీల్ కుమార్ మోదీ సేవలందించారు. అయితే తాజా ఎన్నికల తర్వాత ఆయనకు ఈ పదవిని కేటాయించలేదు. రాజకీయ చతురత కలిగిన ఆయన్ను కేంద్ర మంత్రివర్గంలోకి తీసుకుంటారని అప్పుడు ఊహాగానాలు వినిపించాయి.
ఇదీ చదవండి- కేంద్ర మంత్రివర్గంలోకి సుశీల్ కుమార్ మోదీ..?
