సార్వత్రిక ఎన్నికల తొలి దశలో పోటీచేస్తున్న అభ్యుర్థుల్లో 17శాతం మంది నేరచరితులేనని తేలింది. ఎన్నికల సంఘానికి అభ్యర్థులు సమర్పించిన ప్రమాణపత్రాల ఆధారంగా అసోసియేషన్ ఫర్ డెమొక్రటిక్ రిఫామ్స్ ఈ విషయం వెల్లడించింది.
తొలి దశలో 12 వందల 79మంది పోటీచేస్తున్నారు. ఇందులో 12వందల 66 మంది ఈసీకి సమర్పించిన అఫిడవిట్లను ఏడీఆర్ అధ్యయనం చేసింది.
ఏడీఆర్ నివేదిక
ఏడీఆర్ ఎన్నికల సంస్కరణల కోసం పనిచేస్తున్న ఓ ఎన్జీఓ, ప్రజావేగు. ఈ నివేదిక వివరాలు..
* లోక్సభ తొలిదశ ఎన్నికల్లో పోటీచేస్తున్న 1266 మందిలో 17 శాతం క్రిమినల్ కేసులు ఎదుర్కొంటున్నారు.
* ఒక కోటి లేదా అంతకు మించి ఆస్తులున్న అభ్యర్థులు 32 శాతం
* జాతీయ పార్టీలు ముందంజలో ఉన్నాయి. భాజపా 36 శాతం మంది నేర చరితులకు అవకాశం కల్పించింది. కాంగ్రెస్ అభ్యర్థుల్లో 42 శాతం మందిపై కేసులున్నాయి.
* భాజపా అభ్యర్థుల్లో 19 శాతం మంది, కాంగ్రెస్ అభ్యర్థుల్లో 27 శాతం మందిపై తీవ్రమైన నేరారోపణలు ఉన్నాయి.
* తొలిదశ ఎన్నికలు జరగనున్న 91 లోక్సభ స్థానాల్లో 37 'రెడ్ అలర్ట్ నియోజకవర్గాలు'గా ఏడీఆర్ నివేదిక పేర్కొంది. ఈ స్థానాల్లో పోటీ చేస్తున్న ముగ్గురు అంతకు మించిన అభ్యర్థులు తీవ్ర నేరచరిత్ర కలిగిన వారని తెలిపింది.
