జమ్ము కశ్మీర్కు ప్రత్యేక ప్రతిపత్తి కల్పించే అధికరణ 370 రద్దు అనంతరం.. రాష్ట్రంలో పలు నిషేధాజ్ఞలు విధించారు. ఇందులో భాగంగానే అంతర్జాల సేవల్నీ నిలిపేశారు. అయితే.. పరిస్థితులు సాధారణ స్థితికి చేరుకున్న నేపథ్యంలో జమ్మూ సహా పలు నగరాల్లో మొబైల్ ఇంటర్నెట్ సేవలు పునరుద్ధరించారు. తాజాగా లద్ధాఖ్లోని కార్గిల్ జిల్లాలోనూ దాదాపు 145 రోజుల అనంతరం.. అంతర్జాల సేవలు అందుబాటులోకి వచ్చాయి. అయితే.. ఆర్టికల్ 370 రద్దు నుంచి ఇంటర్నెట్కు దూరంగా ఉన్న కశ్మీర్లో మాత్రం ఎప్పుడు పునరుద్ధరిస్తారో ప్రభుత్వం నుంచి ఎలాంటి స్పష్టతా లేదు.
ఇదీ చూడండి: 145 రోజుల తరువాత మొబైల్ ఇంటర్నెట్ పునరుద్ధరణ
2019 ఆగస్టు 5న అధికరణ 370 రద్దు, జమ్ముకశ్మీర్ విభజనపై కేంద్రం ప్రకటన చేసింది. రాష్ట్రంలో అప్పటి నుంచి ఇంటర్నెట్ సేవలపై నిషేధం కొనసాగింది. క్రమక్రమంగా పలు ప్రాంతాల్లో ఆంక్షల ఎత్తివేసినా.. కశ్మీర్కు మాత్రం ఇంకా ఆ మోక్షం కలగలేదు. 145 రోజులు దాటినా లోయలో అంతర్జాలం ఎప్పుడు పునరుద్ధరిస్తారో ఎలాంటి సంకేతాలివ్వట్లేదు. ఫలితంగా.. దాదాపు 5 నెలలుగా ఇంటర్నెట్ సేవలకు దూరంగా ఉన్న విద్యార్థులు, వ్యాపార వేత్తలు తీవ్ర ఇబ్బందులు ఎదుర్కొంటున్నారు.
ప్రస్తుత డిజిటల్ యుగంలో అంతర్జాల సేవలు లేకుండా పనులు కావట్లేదని ఆవేదన వ్యక్తం చేస్తున్నారు వ్యాపారులు. పోటీ పరీక్షలకు సిద్ధమయ్యే విద్యార్థులు చదువుకోవడానికి, దరఖాస్తులకు ఆన్లైన్ తప్పనిసరి. అక్కడక్కడా ప్రభుత్వం తాత్కాలిక అంతర్జాల కేంద్రాల్ని ఏర్పాటు చేసినప్పటికీ వేలాది మందికి ఏ మాత్రం సరిపోవట్లేదని ప్రభుత్వంపై ఆగ్రహాన్ని వెళ్లగక్కుతున్నారు.
భద్రతా సమీక్ష తర్వాతే...
కార్గిల్లో అంతర్జాల సేవలు అందుబాటులోకి వచ్చిన తర్వాత.. క్రమంగా మిగతా ప్రాంతాలకూ పునరుద్ధరణ నిర్ణయాన్ని విస్తరించే అవకాశం ఉంది. అక్కడ బ్రాడ్బ్యాండ్ ఇంటర్నెట్ సేవలు దశల వారీగా అందుబాటులోకి వస్తాయని తెలిపారు భాజపా ప్రధాన కార్యదర్శి రాం మాధవ్. కశ్మీర్ వ్యాలీలో భద్రతను సమీక్షించిన అనంతరం.. అంతర్జాల సేవల పునరుద్ధరణపై నిర్ణయం ఉంటుందని స్పష్టం చేశారు.
అధికరణ రద్దు నేపథ్యంలో వ్యాలీలో భారీగా మోహరించిన బలగాల్ని కూడా కేంద్రం క్రమంగా ఉపసంహరించుకుంటోంది.
ఇదీ చూడండి: కశ్మీర్లో బలగాల ఉపసంహరణకు కేంద్రం నిర్ణయం
