రహస్యంగా ఓ యువతి వీడియోలు తీసి వేధిస్తున్న ఓ వ్యక్తిని పోలీసులు అరెస్టు చేశారు. ఈ ఘటన కర్ణాటకలోని బెంగుళూరులో జరిగింది. నిరంజన్ అనే వ్యక్తి 4 ఏళ్ల నుంచి హెచ్ఎస్ఆర్ లే అవుట్లో పేయింగ్ గెస్ట్గా ఉంటున్నాడు. అతడు డ్రగ్స్, మద్యానికి బానిసయ్యాడు. ఈ క్రమంలో స్థానికంగా ఉండే ఓ యువతిపై కన్నేశాడు. ఆమె బాత్రూంలో రహస్య కెమెరా పెట్టి.. నగ్న వీడియోలు చిత్రీకరించాడు.
అనంతరం తన నంబర్ తెలియకుండా ఫారిన్ నంబర్తో మెసెజ్లు, కాల్స్ చేసే ఓ యాప్ను ఇన్స్టాల్ చేసుకున్నాడు. ఆ ఫారిన్ నంబర్ నుంచి యువతికి ఆ వీడియోలు పంపించాడు. తనతో శృంగారంలో పాల్గొనకపోతే యువతి నగ్న వీడియోలు పోర్న్ వెబ్సైట్లలో అప్లోడ్ చేస్తానని బ్లాక్మెయిల్ చేశాడు. దీంతో ఆ యువతి పోలీసులకు ఫిర్యాదు చేసింది. దర్యాప్తు చేపట్టిన పోలీసులు.. నిందితుడిని అరెస్టు చేశారు. విచారణలో నిందితుడి ఫోన్లో మరో మూడు వీడియోలు లభించాయి. ఇలా.. నిందితుడు ఇంకెవరినైనా బ్లాక్మెయిల్ చేశాడా అనే కోణంలోనూ దర్యాప్తు చేపట్టారు పోలీసులు.
అబార్షన్ మందులతో మైనర్ మృతి..
ఓ మైనర్ గర్భవతి మరణానికి కారణమైన వ్యక్తికి జీవిత ఖైదు శిక్ష విధిస్తూ కోర్డు తీర్పు వెలువరించింది. ఈ ఘటన ఛత్తీస్గఢ్లో జరిగింది. పెంద్రా పోలీస్ స్టేషన్ పరిధిలోని ఓ గ్రామంలో ఒక బాలిక నివసిస్తోంది. అదే గ్రామానికి చెందిన ఓ వ్యక్తి.. బాలికను ప్రేమిస్తున్నాని చెప్పి ఆమెను శారీరకంగా వాడుకున్నాడు. దీంతో బాలిక గర్భం దాల్చింది. కాగా, విషయం బయటపడకుండా ఉండేందుకు అబార్షన్ అయ్యే మందులను 5 నెలల గర్భంతో ఉన్న బాలికకు ఇవ్వగా.. బాలిక చనిపోయింది.
దీనిపై కేసు నమోదు చేసిన పోలీసులు విచారణ చేపట్టారు. బాలిక వివరాలను సేకరించారు. బాలిక చనిపోయే నాటికి ఆమె వయసు 15 ఏళ్ల 9 నెలలుగా ఉందని నిర్ధరించారు. అనంతరం పోక్సో చట్టం కింద కేసు మార్చి.. నిందితుడిని అరెస్టు చేశారు. అనంతరం కోర్టు.. నిందితుడికి జీవిత ఖైదు విధిస్తూ తీర్పు వెలువరించింది. రూ. 1000 జరిమానా విధించింది. అయితే, నిందితుడు బాలికను చంపాలనే ఉద్దేశంతో ఆ మందులు ఇవ్వలేదని.. గర్భవిచ్ఛిత్తి చేయడానికి మాత్రమే ఇచ్చాడని వ్యాఖ్యానించింది.
బాలుడ్ని బ్లాక్మెయిల్ చేసి.. రూ.31 లక్షలు స్వాహా..!
మధ్యప్రదేశ్లో ఓ బాలుడ్ని ట్రాప్ చేసి దాదాపు రూ. 31 లక్షల నగదు, బంగారు, వెండి ఆభరణాలు దోచుకున్నారు. బాలుడి కుటుంబ సభ్యులు ఇంట్లో చూడగా.. నగదు ఆభరణాలు కనిపించలేదు. అనంతరం వారు పోలీసులకు ఫిర్యాదు చేశారు.
ఏం జరిగిందంటే.. గ్వాలియర్ జిల్లా బీలావా టౌన్కు చెందిన ఓ వ్యక్తి 11 ఏళ్ల క్రితం తన సోదరి కుమారుడ్ని దత్తత తీసుకున్నాడు. ఇప్పుడు అతడి వయసు 12 సంవత్సరాలు. కాగా, ఆ బాలుడు పాలు తీసుకురావడానికి మదన్ శర్మ అనే వ్యక్తి వద్దకు వెళ్లేవాడు. అలా మదన్ శర్మ పిల్లలతో స్నేహం చేశాడు. దీన్ని అదునుగా భావించిన మదన్ శర్మ.. బాలుడ్ని మచ్చిక చేసుకుని అతడికి బీర్ తాగడం, బైక్, కార్లపై షికారు తిరగడం అలవాటు చేశాడు. అలా మే 22న బాలుడిని పిస్తోల్తో బెదిరించి మద్యం తాగించాడు. ఆపై బాలుడి దుస్తులు తీసేసి నగ్నంగా వీడియోలు, ఫొటోలు తీశాడు.
తాను చెప్పినట్లు చేయకపోతే వీడియోలు, ఫొటోలు అందరికీ చూపిస్తానని బాలుడ్ని బ్లాక్మెయిల్ చేశాడు. దీంతో ఆ మైనర్.. మదన్ శర్మ చెప్పినట్టు చేశాడు. మదన్ అడిగినంత నగదు, బంగారు, వెండి ఆభరణాలు తీసుకొచ్చాడు. అక్కడితో ఆగకుండా మరి కొందరికి బాలుడి వీడియోలు పంపించాడు. వాళ్లు కూడా బాలుడ్ని బ్లాక్మెయిల్ చేయడం మొదలుపెట్టారు. అలా 5 నెలలుగా నగదు, ఆభరణాలు కలిపి మొత్తం రూ. 31 లక్షల వరకు దోచుకున్నారు. కాగా, ఈ విషయం తెలిసిన బాధితుడు.. పోలీసులకు ఫిర్యాదు చేశాడు. కేసు నమోదు చేసుకున్న పోలీసులు నిందితుల కోసం గాలింపు చర్యలు చేపట్టారు.
ఇవీ చదవండి :
