రూ.10 ఆశ చూపి 50వేలు కాజేసిన సైబర్​ నేరగాళ్లు

కర్ణాటకకు చెందిన ఓ యువతికి పది రూపాయల ఆఫర్ ఆశచూపి రూ. 50వేలు కాజేశారు నకిలీ ఆన్​లైన్​ ఫుడ్​ డెలివరీ యాప్ నిర్వాహకులు​. బాధితురాలి ఫిర్యాదుతో పోలీసులు కేసు నమోదు చేసి దర్యాప్తు చేపట్టారు.

కర్ణాటక బెంగళూరుకు చెందిన ఓ నకిలీ ఆన్​లైన్ ఫుడ్​ డెలివరీ యాప్​..సవితా శర్మ అనే యువతి అకౌంట్​ నుంచి రూ. 50వేలు కాజేసింది. ఆన్​లైన్​లో రాజస్థానీ భోజనం ఆర్డర్​ చేసిన సవితా శర్మకు రూ.10 ఆఫర్​ అంటూ మరో లింక్ వచ్చింది. యువతి ఆశతో లింక్​పై ​ క్లిక్ చేయగా ఆమె బ్యాంకు ఖాతా​ నుంచి రూ.50వేలు దోచుకున్నారు సైబర్​ నేరగాళ్లు. తరువాత ఫుడ్ యాప్​ నుంచి ఎలాంటి సమాచారం రాలేదు. దీంతో మోసపోయానని తెలుసుకున్న యువతి పోలీసులను ఆశ్రయించింది.

" సైబర్​ నేరాలు చాలా రకాలు. నకిలీ ప్రభుత్వ వెబ్​సైట్లను సృష్టించటం దగ్గర నుంచి ఆన్​లైన్​లో వేధించటం, ఆర్థిక లావాదేవీలు, సమాచారాన్ని తస్కరించటం వంటివి జరుగుతాయి. సైబర్​ నేరగాళ్లు ఎక్కడైనా కూర్చొని..ప్రజల బ్యాంకు​ ఖాతాలను నగదు కాజేస్తారు. ప్రజలు తమ క్రెడిట్​, డెబిట్​ కార్డుల వివరాలను ఎవ్వరికీ చెప్పవద్దు. ఒకవేళ ఎవరైనా ఆన్​లైన్​లో మోసపోయామని భావిస్తే..వెంటనే స్థానిక పోలీస్​ స్టేషన్​ను సంప్రదించాలి. "

--అభినవ్​ సౌరభ్, సైబర్​ నిపుణులు

అయితే ఇలాంటి సైబర్​ నేరాలకు పాల్పడుతున్న రాజస్థాన్​ గ్యాంగ్​ను కర్ణాటక పోలీసులు ఇటీవల అరెస్ట్ చేశారు. నకిలీ ఆధార్ కార్డ్స్ సృష్టించి వాటితో డూప్లికేట్​ సిమ్​ కార్డులను పొందాలని చూశారు.

ఇదీ చదవండి : చిలుక కోసం పాముతో ఐదేళ్ల బుడతడి పోరాటం