మహారాష్ట్ర అమరావతి జిల్లాలో ఘోర ప్రమాదం జరిగింది. గాడేగావ్ సమీపంలోని వార్దా నదిలో పడవ బోల్తా పడి నలుగురు ప్రాణాలు కోల్పోయారు. మరో ఏడుగురు గల్లంతయ్యారు. మృతుల్లో ఇద్దరు ఒకే కుటుంబానికి చెందిన వారని అధికారులు గుర్తించారు. వీరిలో ఓ మైనర్ కూడా ఉన్నట్లు వెల్లడించారు.
ఇదీ జరిగింది..
గాడేగావ్ గ్రామానికి చెందిన 12 మంది సమీపంలో జలపాతాలు, ఆలయాన్ని సందర్శించేందుకు బోటు ఎక్కారు. జలపాతాలు సందర్శన తర్వాత.. ఆలయం వైపు వెళ్తున్న క్రమంలో ఉదయం 10.30 గంటలకు బోటు బోల్తా పడింది. ఈ క్రమంలో ఇద్దరు వ్యక్తులు క్షేమంగా ఒడ్డుకు చేరగా.. మిగతా వారు గల్లంతయ్యారు. గాలింపు చర్యలు చేపట్టిన సహాయక సిబ్బంది.. బోటు సిబ్బంది నారాయణ్ మతారే (45) సహా ఓ మైనర్ మరో ఇద్దరి మృతదేహాలను వెలికితీశారు. మృతులు వాన్షికా శివంకర్(2), కిరణ్ ఖండాలే(25) ఒకే కుటుంబానికి చెందిన వారని గుర్తించిన పోలీసులు.. బంధువుల అంత్యక్రియలకు హాజరై తిరిగి వస్తుండగా ఈ ప్రమాదంలో ప్రాణాలు కోల్పోయారని వెల్లడించారు.
ఈ ఘటనలో గల్లంతైన మరో ఏడుగురి ఆచూకీ కోసం సహాయక సిబ్బంది గాలింపు చర్యలు విస్తృతం చేశారు.
బోటు సామర్థ్యానికి మించి ప్రయాణికులు ఉండటం వల్లే ఈ ప్రమాదం జరిగినట్లు అధికారులు భావిస్తున్నారు.
ఇదీ చూడండి : భాజపా ఎంపీ ఇంటి వద్ద బాంబు దాడి- వారంలో రెండోసారి!
