నేటి యువత కొద్దిపాటి శ్రమకే డీలా పడిపోతోంది. కంప్యూటర్ల పుణ్యమా అని శారీరక శ్రమకు దూరంగా ఉంటోంది. ఇక శారీరక బలం లేక.. ఏ పని చేయలేకపోతోంది. అలాంటిది ఓ వ్యక్తి.. 92ఏళ్ల వయసులో కూడా చురుకుగా క్రీడల్లో పాల్గొంటూ అందరికి ఆదర్శంగా నిలుస్తున్నారు. పరుగుపందెంతో పాటు వివిధ క్రీడల్లో పాల్గొంటూ.. సునాయాసంగా పతకాలు వెనకేసుకుంటున్నారు. ఆయనే.. గుజరాత్లోని సూరత్కు చెందిన హరేష్ దేశాయ్.
బ్యాంక్ ఆఫీసర్గా పని చేసి రిటైర్ అయిన హరేష్కు.. క్రీడలంటే ఎంతో ఇష్టం. అందుకే.. సీనియర్ సిటీజన్ల కోసం నిర్వహించే పోటీల్లో పాల్గొనడం మొదలుపెట్టారు. 2010లో మలేసియాలో జరిగిన ఆసియాన్ మాస్టర్స్ ఛాంపియన్షిప్కు భారత్ తరపున ప్రాతినిథ్యం వహించారు. ఆ పోటీల్లో మూడో స్థానంలో నిలిచారు. 2012లో జరిగిన స్థానిక క్రీడా పోటీల్లో పాల్గొని.. హ్యామర్ త్రోలో మూడో స్థానాన్ని దక్కించుకున్నారు. 2016లో జరిగిన జాతీయ స్థాయి పోటీల్లో విజేతగా నిలిచారు. ఇటీవల వారణాసిలో నిర్వహించిన టోర్నీలో కూడా రెండు పసిడి పతకాలు, ఓ రజతాన్ని సాధించారు. వంద మీటర్ల పరుగు, షాట్పుట్, హ్యామర్ త్రో క్రీడల్లో ఆయనక ఎదురులేదు!
ఈ వయసులోనూ.. శారీరకంగా దృఢంగా ఉండేలా జాగ్రత్తలు తీసుకుంటానని అంటున్నారు హరేశ్. రోజుకు అరగంట పాటు వ్యాయామం తప్పనిసరిగా చేస్తానని చెప్పిన ఆయన.. ప్రతి ఒక్కరు ఫిట్గా ఉండాలని పిలుపునిచ్చారు.
ఇదీ చూడండి : బిల్లు అడిగారని లిక్కర్ పారబోసి నిరసన.. వీడియో వైరల్
