'400మంది నక్సల్స్​.. బుల్లెట్ల వర్షం కురిపించారు '

ఛత్తీస్‌గఢ్​‌లో జరిగిన భయంకరమైన ఎన్​కౌంటర్ గురించి కళ్లకు కట్టినట్లు వివరించారు గాయపడిన కొందరు జవాన్లు. దాదాపు 400 మంది నక్సల్స్​ నలువైపుల నుంచి బుల్లెట్ల వర్షం కురిపించారని తెలిపారు.

ఛత్తీస్​గఢ్​ బీజాపుర్​ దండకారణ్యంలో జరిగిన భీకర ఎన్​కౌంటర్ గురించి ప్రత్యేక టాస్క్​ఫోర్స్​(ఎస్​టీఎఫ్​), కోబ్రా బెటాలియన్​ జవాన్లు మరిన్ని విషయాలు వెల్లడించారు. భద్రత దళాలపై దాదాపు 400 మంది మావోయిస్టులు అనుహ్యంగా దాడి చేశారని ఎస్​టీఎఫ్​ కానిస్టేబుల్​ దేవ్​ ప్రకాశ్​ తెలిపాడు. వారికి పట్టున్న ప్రాంతంలో పథకం ప్రకారం అన్ని వైపుల నుంచి ఒక్కసారిగా బుల్లెట్ల వర్షం కురిపించారని​ పేర్కొన్నాడు.

"నక్సల్స్​కు దీటుగా జవాన్లు ఎదురుకాల్పులు జరిపారు. ఐదు గంటల పాటు ఎన్‌కౌంటర్‌ జరిగింది. ఈ పోరులో భద్రతా సిబ్బంది ప్రాణాలు కోల్పోయారు. అయితే పలువురు మావోయిస్టులను హతమార్చాం" అని ప్రకాశ్​ చెప్పుకొచ్చారు.

ప్రతీకారం తీర్చుకుంటాం

"నక్సల్స్​ అన్ని వైపుల నుంచి బుల్లెట్లు వర్షం కురిపించారు. భారీ కాల్పుల మధ్య, భద్రతా సిబ్బంది మృతదేహాలను మరొక ప్రదేశానికి తరలించడం చాలా కష్టమైంది. అయితే భవిష్యత్తులో మావోయిస్టులపై జవాన్లు తమ పోరాటాన్ని మరింత శౌర్యంతో కొనసాగిస్తారు" అని మరో జవాన్​ పేర్కొన్నారు.

కొందరు స్థానికులు మావోలతో కలిసి..

మావోయిస్టులు లైట్​ మెషిన్​ గన్లతో దాడి చేయగా.. తక్కువ ప్రభావం చూపే ఐఈడీ బాంబులను తమపైకి విసిరారని కోబ్రా బెటాలియన్​కు చెందిన కానిస్టేబుల్​ బాల్​రాజ్​ సింగ్​ వెల్లడించారు. మెరుగైన పేలుడు పరికరాలతో నక్సల్స్​ దాడి చేయడం వల్లే ఎక్కువ మంది భద్రతా సబ్బంది చనిపోయారని సింగ్​ చెప్పుకొచ్చారు. కొంతమంది స్థానికులు కూడా మావోయిస్టులతో కలిసిపోయారని వివరించారు.

బీజాపుర్​ జిల్లాలో జరిగిన ఎన్​కౌంటర్​లో మొత్తం 23మంది భద్రతా సిబ్బంది మరణించారు. మరో 31 మంది గాయపడ్డారు.

ఇదీ చూడండి: జవాన్లపై 400 మంది నక్సలైట్ల ముప్పేట దాడి!