ఉత్తర్ప్రదేశ్లో దారుణం జరిగింది. ఇంటి బయట ఆడుకుంటున్న నాలుగేళ్ల బాలికపై హత్యాచారానికి పాల్పడ్డాడు 26 ఏళ్ల వ్యక్తి. ఈ ఘటన బులంద్శహర్ జిల్లాలో జరిగింది.
పోలీసులు తెలిపిన వివరాల ప్రకారం.. జహంగీరాబాద్ పోలీస్ స్టేషన్ పరిధిలో ఓ బాలిక నివసిస్తోంది. ఆదివారం సాయంత్రం 4.30 గంటల సమయంలో ఇంటి ఆవరణలో ఆడుకుంటోంది. కొద్దిసేపటి తర్వాత కనిపించకుండా పోయింది. బాలిక పొరుగింట్లో ఉన్న ఓ వ్యక్తి ఆమెను మభ్యపెట్టి.. తన ఇంటికి తీసుకెళ్లాడు. అనంతరం ఆమెపై అత్యాచారం చేశాడు. తన విషయం బయటపడుతుందని హత్య చేశాడు.
ఈ క్రమంలో కనిపించకుండా పోయిన బాలిక కోసం కుటుంబ సభ్యులు కొన్ని గంటల పాటు వెతికారు. అలా తమ పొరుగింట్లో వెతకగా.. మంచం కింద బాలిక విగతజీవిగా పడి ఉంది. మృతదేహం పక్కనే మద్యం మత్తులో నిందితుడు పడి ఉన్నాడు. కోపోద్రిక్తులైన బాలిక కుటుంబ సభ్యులు, స్థానికులు.. నిందితుడిని చితకబాదారు. ఈ ఘటనపై సమాచారం అందుకున్న పోలీసులకు.. నిందితుడిని అదుపులోకి తీసుకున్నారు. ఘటనా స్థలం నుంచి రక్తంతో తడిచిన బాలిక దుస్తులను, మృతదేహాన్ని స్వాధీనం చేసుకున్నారు. పోస్టుమార్టం పరీక్షల నిమిత్తం మృతదేహాన్ని ఆస్పత్రికి తరలించారు. తీవ్రంగా గాయపడిన యువకుడిని కూడా ఆస్పత్రికి తరలించారు. నిందితుడిపై పలు సెక్షన్ల కింద కేసు నమోదు చేసి దర్యాప్తు చేపట్టారు.
బాలికపై హత్యాచారం.. మృతదేహాన్ని పెరట్లో పడేసి..
గతేడాది ఇలాంటి ఘటనే హరియాణాలో జరిగింది. ఏడేళ్ల బాలికపై అత్యాచారానికి పాల్పడి అనంతరం హత్య చేశాడు ఓ వ్యక్తి. నిందితుడ్ని యమునానగర్కు చెందిన యోగేశ్గా పోలీసులు గుర్తించారు. కోల్కతాలోని హౌరా రైల్వే స్టేషన్లో అతడిని అరెస్ట్ చేసి పానీపత్కు తరలించారు.
పోలీసులు తెలిపిన వివరాల ప్రకారం.. దీపావళి పండుగ రోజు రాత్రి పానీపత్లోని కుల్‌దీప్ నగర్‌లోని తన ఇంటి బయట ఆడుకుంటున్న బాలికను నిందితుడు యోగేశ్ కిడ్నాప్ చేసి ఆమెను రేప్ చేశాడు. అనంతరం హత్య చేసి బాధితురాలి ఇంటి పెరట్లోనే పడేశాడు. ఇది తెలియని బాలిక కుటుంబ సభ్యులు ఆమె కోసం వెతికారు. కానీ ఎంతకీ ఆమె ఆచూకీ దొరకలేదు. తర్వాతి రోజు ఉదయం తన ఇంటి పెరట్లో బాలిక విగతజీవిగా కనిపించింది. సమాచారం అందుకున్న పోలీసులు.. ఘటనా స్థలానికి చేరుకుని.. మృతదేహాన్ని స్వాధీనం చేసుకున్నారు. పరారీలో ఉన్న నిందితుడి కోసం రూ. 50 వేల రివార్డు ప్రకటించారు. నిందితుడి కోసం గాలిస్తున్న క్రమంలో అతడి ఇంటి తలుపులను పగలగొట్టగా.. రక్తంతో తడిచిన బట్టలు కనిపించాయి. అయితే, ఇలాంటి ఘటనల్లో నిందితుడు ఇదివరకే ఐదేళ్లు జైలు శిక్ష అనుభవించాడు.
