Bihar CM Janta Darbar Covid: ప్రజల్ని నేరుగా కలిసి, వారి సమస్యలు వినేందుకు బిహార్ ముఖ్యమంత్రి నితీశ్ కుమార్ నిర్వహించే జనతా దర్బార్.. కరోనా వ్యాప్తికి వేదికైంది. ఈ కార్యక్రమానికి హాజరైన 14 మందికి కొవిడ్ పాజిటివ్గా తేలింది. ఇందులో ముగ్గురు పోలీస్ కానిస్టేబుళ్లు ఉన్నారని అధికారులు తెలిపారు.
ప్రజాదర్బార్కు వచ్చే పౌరులకు అక్కడికక్కడే యాంటీజెన్ పరీక్షలు నిర్వహించారు. ఇందులో 14 మందికి పాజిటివ్గా తేలిందని అధికారులు తెలిపారు. దీంతో అప్రమత్తమైన అధికారులు అవసరమైన జాగ్రత్తలు తీసుకున్నారు.
Bihar covid cases
కరోనా వ్యాప్తిని దృష్టిలో ఉంచుకునే ముందుగానే పరిమిత సంఖ్యలో పౌరులను ప్రజా దర్బార్కు అనుమతించినట్లు అధికారులు తెలిపారు. 200 కన్నా తక్కువ మందినే పిలిచినట్లు తెలిపారు. అయితే, కొన్ని నెలల క్రితమే ఆన్లైన్ రిజిస్ట్రేషన్ పూర్తి చేసుకొన్న కొంతమంది.. తమకు ఇంకా ప్రజాకోర్టుకు పిలుపు రాలేదన్న అసంతృప్తితో నేరుగా ఇక్కడికి వచ్చారని వివరించారు.
వైద్యులపై పడగ
మరోవైపు, బిహార్లో వైద్యులపై కరోనా పంజా విసురుతోంది. పట్నాలోని నలంద వైద్య కళాశాల, ఆస్పత్రిలో(ఎన్ఎంసీహెచ్) 87 మంది వైద్యులు కరోనా బారినపడడం కలకలం సృష్టించింది. ఎన్ఎంసీహెచ్లో మొత్తం 194 నమూనాలకు ఆర్టీ-పీసీఆర్ పరీక్షలు నిర్వహించగా.. అందులో శనివారం 12 మందికి కరోనా సోకినట్లు తేలింది. మరో 75 మందికి ఆదివారం వైరస్ నిర్ధరణ అయింది. అయితే.. కొవిడ్ సోకిన వారిలో ఐదుగురు మాత్రమే ఆస్పత్రిలో చేరగా.. మిగతా వారంతా హోం ఐసొలేషన్లో ఉన్నట్లు తెలుస్తోంది. అటు కోల్కతాలో వంద మందికి పైగా వైద్యులు కరోనా బారిన పడ్డారు. దీనిపై పూర్తి వివరాల కోసం ఈ లింక్పై క్లిక్ చేయండి.
ఇదీ చదవండి: టీనేజ్ వ్యాక్సినేషన్.. టీకా కేంద్రాల్లో పిల్లల సందడి..
