అసోంలో 1,050 మంది మిలిటెంట్ల లొంగుబాటు

అసోంలో ఐదు సంస్థలకు చెందిన వెయ్యిమందికిపైగా మిలిటెంట్లు ​ లొంగిపోయినట్లు అధికారులు వెల్లడించారు. వీరిలో కీలక ఉగ్రనేత ఇంగ్​తి కథార్​ సాంగ్​బిజిత్​ కూడా ఉన్నట్లు పేర్కొన్నారు. తిరిగి జనజీవన స్రవంతిలో కలవాలనే ఉద్దేశంతోనే వారు లొంగిపోయారని తెలిపారు.

అసోంలో ఓ కరడుగట్టిన మిలిటెంట్​ ఇంగ్​తి కథార్​ సాంగ్​బిజిత్​ సహా ఐదు సంస్థలకు చెందిన 1,039 మంది లొంగిపోయినట్లు అధికారులు తెలిపారు. పీపుల్స్​ డెమోక్రటిక్​ కౌన్సిల్​ ఆఫ్​ కార్బీ లాంగ్రీ (పీడీసీకే), కార్బీ లాంగ్రీ ఎన్‌సీ హిల్స్​ లిబరేషన్​ ఫ్రంట్​ (కేఎల్​ఎన్​ఎల్​ఎఫ్​), కార్బీ పీపుల్స్​ లిబరేషన్​ టైగర్​ (కేపీఎల్‌టీ), కుకి లిబరేషన్​ ఫ్రంట్​ (కేఎల్‌ఎఫ్​), యునైటెడ్​ పీపుల్స్​ లిబరేషన్​ ఆర్మీ (యూపీఎల్‌ఏ) సంస్థలకు చెందిన ముష్కరులు జనజీవన స్రవంతిలోకి చేరేందుకు సీఎం ముందు సర్బానంద సోనోవాల్ ముందు ఆయుధాలతో పాటు లొంగిపోయారని పేర్కొన్నారు.

పీడీసీకే సంస్థ నాయకుడైన సాంగ్​బిజిత్.. గతంలో నిషేధిత సంస్థ నేషనల్​ డెమోక్రటిక్​ ఫ్రంట్​ ఆఫ్​ బోడోలాండ్​ కమాండర్​ ఇన్ చీఫ్​గా పని చేశాడు. గత బోడోలాండ్ టెరిటోరియల్ ఏరియా జిల్లాల్లో మైనారిటీ వర్గాల ప్రజల ఊచకోత సహా పలు ఉగ్రకార్యకలాపాల్లో పాల్గొన్నాడు.

లొంగిపోయిన వారికి ఆర్థిక సాయం చేస్తామన్న సీఎం​.. తమ ప్రభుత్వం అసోంను ఉగ్రవాద రహిత రాష్ట్రంగా తయారు చేస్తుందన్నారు.

ఇదీ చూడండి: తిహార్​ జైలు నుంచి దిశ రవి విడుదల