People questioned MLA Jaganmohan Rao: ఎమ్మెల్యేను అడ్డుకున్న ప్రజలు.. సమస్యలపై నిలదీత

Veerulapadu Villagers Questioned MLA Jaganmohan Rao: నందిగామ ఎమ్మెల్యే మొండితోక జగన్​మోహన్​ రావుకు అనూహ్యమైన ఘటన ఎదురైంది. నందిగామ మండలం వీరులపాడు గ్రామస్థులు ఎమ్మెల్యేను పలు సమస్యలపై నిలదీశారు. దీనిపై స్పందించిన ఎమ్మెల్యే.. గ్రామస్థులు అడిగిన ప్రశ్నలకు సమాధానామిచ్చారు. వీరులపాడు గ్రామంలో జగనన్న సురక్ష కార్యక్రమాన్ని నిర్వహించారు. ఆ కార్యక్రమంలో నందిగామ ఎమ్మెల్యే మొండితోక మొండితోక జగన్​మోహన్​ రావు పాల్గొనగా.. మండల కేంద్రాన్ని వీరులపాడు నుంచి మార్పు చేయటంపై గ్రామస్థులు ప్రశ్నించారు. అంతేకాకుండా దాములూరు వద్ద వైరా నదిపై నిర్మించిన కాజ్​వేకి అనుసంధానంగా నిర్మించిన అప్రోచ్​ రోడ్లు నిర్మించకపోవటంపై ఎమ్మెల్యేను నిలదీశారు. రోడ్ల నిర్మాణం వెంటనే చేపట్టాలని, మండల కేంద్రాన్ని వీరులపాడులోనే కొనసాగించాలని గ్రామస్థులు డిమాండ్​ చేశారు. దీంతో ఎమ్మెల్యే స్పందిస్తూ.. మండల కేంద్ర మార్పు అంశం మండలం మొత్తానికి సంబంధించిన వ్యవహారమని సమాధానమిచ్చారు. దీనిపై మిగతా గ్రామాల ప్రజలను పిలిపించి మాట్లాడతానని అన్నారు. ఈ సమస్యపై ఎప్పుడు మాట్లాడటానికైనా తాను సిద్ధంగా ఉన్నానని.. ఎప్పుడు పిలిచినా వస్తానని తెలిపారు. ఈ వ్యవహారాన్నంతటినీ సెల్​ఫోన్​లో రికార్డు చేస్తున్న ఓ యువకుడి సెల్​ఫోన్​ను ఎమ్మెల్యే అనుచరులు లాక్కున్నారు.