police harassment: ప్రాణాల మీదకి తెచ్చిన స్నేహితుడి ప్రేమ పెళ్లి.. యువకుడికి పోలీసుల టార్చర్!

Young man attempted suicide due to police harassment: కర్నూలు జిల్లా హలహర్వి మండలం విరుపాపురం గ్రామానికి చెందిన రఫిక్ అనే యువకుడు పోలీసుల వేధింపుల తట్టుకోలేక పురుగుల మందు తాగి ఆత్మహత్యాయత్నం చేశాడు. తల్లిదండ్రులు రఫిక్​ను వెంటనే ఆలూరు ప్రభుత్వ ఆసుపత్రికి తరలించగా.. ప్రస్తుతం ఆరోగ్య పరిస్థితి విషమంగా ఉన్నట్లు వైద్యులు వెల్లడించారు. విరుపాపురం గ్రామానికి చెందిన రఫిక్ స్నేహితుడు.. అదే గ్రామానికి చెందిన ఓ యువతిని ప్రేమించాడు. ఈ క్రమంలో నెల రోజుల కిందట యువతిని వెంటబెట్టుకుని పారిపోయి వివాహం చేసుకున్నారు. యువతి తల్లిదండ్రులు హలహర్వి పోలీస్ స్టేషన్​లో ఫిర్యాదు చేయగా మిస్సింగ్ కేసు నమోదు చేశారు. కాగా, వారికి రఫిక్ సహకరించాడని.. పోలీసులు నెలరోజులుగా రోజూ స్టేషన్​కు పిలిపించి తమ కుమారుడని కొట్టారని తల్లిదండ్రులు ఆరోపించారు. రఫిక్ సహకరించాడనే అనుమానంతో హలహర్వి ఏఎస్ఏ.. రఫీక్​ను చితకబాదాడని తెలిపారు. నిత్యం వేధింపులు తాళలేక రూ.30వేలు ఇచ్చినా తమ కుమారుడిని వదల్లేదని ఆరోపించారు. ఓ వైపు అవమాన భారం, మరో వైపు పోలీసుల వేధింపులు తట్టుకోలేక తమ కుమారుడు ఆత్మహత్యకు యత్నించాడని రఫిక్ తల్లిదండ్రులు వాపోయారు.