గుంటూరు టీడీపీ కార్యాలయంలో పోలీసుల హడావుడి - మఫ్టీలో వచ్చి హల్​చల్​

Pedha Kakani Police at Guntur TDP Office: గుంటూరు జిల్లా టీడీపీ కార్యాలయంలో పెదకాకాని పోలీసుల హడావుడి వివాదానికి దారి తీసింది. ఓ అత్యాచారం కేసులో నిందితుడ్ని పట్టుకునే క్రమంలో పోలీసులు టీడీపీ కార్యాలయంలో హైరానా సృష్టించారు. ఓ మహిళ  ఫిర్యాదు మేరకు విజయవాడకు చెందిన వ్యక్తిని పట్టుకునేందుకు పోలీసులు గాలింపు చర్యలు చేపట్టారు. ఈ క్రమంలో అతని సెల్ ఫోన్ సిగ్నల్ ఆధారంగా అతడ్ని వెతుక్కుంటూ వస్తున్న పోలీసులకు.. అతడు గుంటూరు జిల్లా టీడీపీ కార్యాలయంలో ఉన్నట్లు చూయించింది. దీంతో పార్టీ కార్యాలయంలోకి మఫ్టీలో వచ్చిన కానిస్టేబుల్ ​అక్కడ ఫొటోలు తీయసాగాడు. అదే సమయంలో ఆ కార్యాలయంలో బీసీ వర్గాల సమావేశం జరుగుతోంది. గమనించిన టీడీపీ నేతలు కానిస్టేబుల్​ను ప్రశ్నించగా.. పారిపోయేందుకు యత్నించాడు. 

నేతలందరూ కలిసి కానిస్టేబుల్​ను పట్టుకున్నారు. విషయం తెలుసుకున్న పెదకాకాని సీఐ టీడీపీ కార్యాలయానికి వచ్చి.. టీడీపీ నేతలను ప్రశ్నించారు. అనుమతి లేకుండా కార్యాలయంలోకి ఎలా వస్తారని.. టీడీపీ జిల్లా అధ్యక్షులు తెనాలి శ్రావణ్​ ప్రశ్నించారు. ఓ వ్యక్తిని పట్టుకునేందుకు వచ్చామని సీఐ తెలపగా.. నేరస్తుడి కోసం వచ్చామని చేప్తే తామే పట్టిచ్చేవాళ్లమని టీడీపీ నేతలు స్పష్టం చేశారు. అనంతరం అసలు పార్టీకి సంబంధం లేని వ్యక్తి, నిందితుడైన చల్లా లక్ష్మీనారాయణను పోలీసులు తమ వెంట తీసుకువెళ్లారు.