కడప జిల్లా రాజంపేట టెలిఫోన్ శాఖకు చెందిన ప్రసాద్ ఫిర్యాదు మేరకు పోలీసులు దర్యాప్తు చేపట్టారు. అంతర్జాతీయ కాల్స్ ని రిసీవ్ చేసుకునే కేంద్రంపై దాడి చేసి 500 సిమ్ కార్డులతోపాటు కంప్యూటర్లు, లాప్ టాప్, సిమ్ము లను అమర్చే ప్రత్యేక పరికరాన్ని, ముగ్గురు వ్యక్తులను అదుపులోకి తీసుకున్నారు. అనంతరం నిందితులను, వస్తువులను మీడియా ముందు ప్రవేశపెట్టారు. వివిధ దేశాల నుంచి వచ్చే ఫోన్ కాల్స్ గేట్ వే వద్ద రికార్డు అయి వస్తాయని డీఎస్పీ నారాయణస్వామి రెడ్డి తెలిపారు. రికార్డ్ చేసిన కాల్ ఎవరు చేశారు ఎక్కడినుంచి చేశారు అనే విషయం స్పష్టంగా తెలుస్తుందని చెప్పారు. గేట్వే వద్ద రికార్డ్ కాకుండా నేరుగా వచ్చే కాల్స్ తో ఉగ్రవాద ముప్పు పొంచి ఉందన్నారు. ఇతర దేశాల నుంచి వచ్చే ఫోన్ కాల్స్ ని గేట్వేలో రికార్డు కాకుండా నేరుగా రాజంపేటలో ప్రత్యేకంగా ఏర్పాటు చేసిన పరికరానికి చేరుతున్నాయని తెలిపారు. ఇక్కడినుంచి స్థానిక సిమ్ కార్డుల ద్వారా ప్రజలకు కాల్స్ వెళ్తాయని వివరించారు. దీనివల్ల కాల్ బయట నుంచి వచ్చిందనే విషయం తెలియదని చెప్పారు. భారతదేశంలో నిషేధించిన ఓ పరికరాన్ని ఉపయోగించి అంతర్జాతీయ కాల్ ని స్థానిక కాల్స్ గా మార్చి సొమ్ము చేసుకుంటున్నారని వివరించారు. ఈ వ్యవహారంలో లక్ష్మీనారాయణ అనే వ్యక్తి ప్రధాన సూత్రదారుడన్నారు. ప్రస్తుతం అతను కువైట్లో ఉన్నట్టు వివరించారు. టెలిఫోన్ కార్యాలయంలో పని చేస్తున్న మహమ్మద్ షరీఫ్ తో పాటు సిమ్ కార్డులను సరఫరా చేసిన రాజు, రాజశేఖర్ అనే వ్యక్తులను అదుపులోకి తీసుకొని విచారిస్తున్నామన్నారు.
ఇది కూడా చదవండి.
