కడప జిల్లా ఓబులవారిపల్లె మండలం మంగంపేట కాపుపల్లెలో ప్రభుత్వ విప్ కొరముట్ల శ్రీనివాసులు, జిల్లా జాయింట్ కలెక్టర్ గౌతమి అధ్యక్షతన మంగంపేట నిర్వాసితుల సమస్యలపై గ్రామసభ నిర్వహించారు. ఏపీఎండీసీ మైనింగ్ పక్కనే ఉన్న డేంజర్ జోన్లోని హరిజనవాడ, అరుంధతివాడ, కాపుపల్లి గ్రామాల ప్రజలతో మాట్లాడారు. పునరావాసం, పునర్ ఉపాధి కల్పన చట్టం 2013, 2018 అనుసరించి రెండు ప్యాకేజీలు ప్రకటించారు.
1. డేంజర్ జోన్ పరిధిలో ఉన్న కుటుంబం ఇతర ప్రాంతాలకు వెళ్లి స్థిరపడాలనుకునే వారికి 7 లక్షల రూపాయల పరిహారం ఇవ్వడం.
2. ప్రభుత్వం కల్పించిన ఐదు సెంట్ల స్థలంలో ఇల్లు ఏర్పాటు చేసి మౌలిక సదుపాయాలు, నిర్మాణాలు చేసి కుటుంబానికి 4 లక్షల రూపాయలు పరిహారం ఇవ్వడం.
నవంబర్ 12వ తేదీలోగా డేంజర్ జోన్ గ్రామాల పరిధిలో ఉన్న ప్రజల వినతులు ప్రభుత్వం దృష్టికి తీసుకెళ్లి సమస్యను పరిష్కరించాలని అధికారులను ప్రభుత్వ విప్ కోరారు. స్థానిక గ్రామాల ప్రజలు ఏపీఎండీసీ ఉన్నతికి తమ భూములు ఇచ్చామన్నారు. తమ గ్రామాల నిరుద్యోగ యువతకు ఉద్యోగాలు కల్పించాలని కోరారు. సానుకూలంగా స్పందించిన ప్రభుత్వ విప్... సమస్యలన్నీ ముఖ్యమంత్రి జగన్ దృష్టికి తీసుకెళ్లి పరిష్కరిస్తామని హామీ ఇచ్చారు. ఈ కార్యక్రమంలో సబ్కలెక్టర్ కేతన్ గార్గ్, ఏపీఎండీసీ అధికారులు, మండల అధికారులు, పోలీసులు, ప్రజా ప్రతినిధులు, పలువురు పాల్గొన్నారు.
నిర్లక్ష్యానికి గురవుతున్నాయి..
మంగంపేట గ్రామపంచాయతీ పరిధిలో ఏపీ మినరల్ డెవలపమెంట్ కార్పొరేషన్... 50 ఏళ్లుగా ముగ్గురాయి ద్వారా వేలాది కోట్లు రూపాయాలు లబ్ధి పొందుతోంది. అయితే.. ఏపీఎండీసీ మైనింగ్ పక్కనే ఉన్న డేంజర్ జోన్ గ్రామాలు హరిజనవాడ, అరుంధతివాడ, కాపుపల్లి మాత్రం నిర్లక్ష్యానికి గురవుతున్నాయి. ఫలితంగా మూడు గ్రామాల ప్రజలు దశాబ్ద కాలంగా ఇబ్బందులు పడుతున్నారు. వారి ఇబ్బందులు ప్రభుత్వ దృష్టికి తీసుకెళ్లినప్పటికి పార్టీలు, ప్రభుత్వాలు మారడం వల్ల వారి సమస్యలు పరిష్కారం కావట్లేదు. వైయస్ఆర్ ముఖ్యమంత్రిగా ఉన్న సమయంలో మంగంపేటలోని కొన్ని గ్రామాలు ఇతర ప్రాంతాలకు తరలించి వారిలో కొందరికి ఉద్యోగ భద్రత కల్పించారు. అదేవిధంగా డేంజర్ జోన్ గ్రామాల ప్రజలు కూడా ఉద్యోగంతో పాటు వారికి ఇల్లు, నష్టపోయిన భూములకు నష్టపరిహారం ఇచ్చి ఆదుకోవాలని నిర్వాసితులు కోరుతున్నారు.
ఇదీ చూడండి:
రాష్ట్ర వ్యాప్తంగా ఆపరేషన్ ముస్కాన్... వెట్టి నుంచి బాలలకు విముక్తి
