కడప జిల్లా ప్రొద్దుటూరు ప్రాంతంలో క్రికెట్ బెట్టింగ్ జోరుగా సాగుతోంది. ఇండియా క్రికెట్ మ్యాచ్ ఉందంటే చాలు... అది ఏ ఫార్మాట్ మ్యాచ్ అయినా బెట్టింగ్ జరగాల్సిందే. ప్రొద్దుటూరులో వందలమంది క్రికెట్ బెట్టింగ్ రాయుళ్లు... బెంగళూరు, గోవా, హైదరాబాద్కు చెందిన ప్రధాన నిర్వాహకులతో ఆన్లైన్ అప్లికేషన్లో పేర్లు నమోదు చేసుకుని బెట్టింగ్ చేస్తున్నట్లు కడప జిల్లా పోలీసులు గుర్తించారు. వీరంతా కమ్యూనికేటర్ ద్వారా లక్షల రూపాయల బెట్టింగ్ చేస్తున్నట్లు తేలింది.
జిల్లాకు చెందిన స్పెషల్ ఎన్ ఫోర్స్మెంట్ బ్యూరో అదనపు ఎస్పీ చక్రవర్తికి వచ్చిన సమాచారం మేరకు క్రికెట్ బెట్టింగ్ రాయుళ్లపై నిఘా పెట్టి నిందితులను అదుపులోకి తీసుకున్నారు. బెంగళూరు, గోవా, హైదారాబాద్ ప్రాంతాల్లో దాడులు నిర్వహించి వారిని అదుపులోకి తీసుకున్నారు. 31 మంది క్రికెట్ బుకీలను అరెస్ట్ చేసి ప్రొద్దుటూరులో కోర్టులో హాజరుపరిచారు. వీరిలో భీమవరం, హైదరాబాద్, కర్నూలు జిల్లాకు చెందిన ఐదుగురు నిందితులు మినహా మిగిలిన వారంతా ప్రొద్దుటూరు ప్రాంతానికి చెందినవారేనని జిల్లా ఎస్పీ అన్బురాజన్ తెలిపారు. ఆరు నెలల పాటు క్రికెట్ బుకీల బ్యాంకు లావాదేవీలు పరిశీలిస్తే.. దాదాపు 34 కోట్ల రూపాయల లావాదేవీలు క్రికెట్ బెట్టింగ్ జరిపినట్లు వెల్లడైందన్న ఎస్పీ... బ్యాంకు ఖాతాల పుస్తకాలను ఐటీ శాఖకు అప్పగిస్తున్నామన్నారు.
క్రికెట్ బెట్టింగ్ నిర్వహించే విషయం పోలీసులు కూడా గుర్తించలేని విధంగా బెట్టింగ్ రాయుళ్లు ప్రత్యేకంగా స్మార్ట్ ఫోన్లో యాప్ తయారు చేసుకున్నారు. బెట్టింగ్ ఆడే వారంతా అందులో సబ్ స్క్రైబర్స్గా నమోదు చేసుకుని బెట్టింగ్ చేసే విధంగా నిబంధనలు పెట్టుకున్నారు. లావాదేవీలన్నీ ఆన్లైన్ ద్వారానే నిర్వహిస్తున్నారు. వారు నిర్వహిస్తున్న లొకేషన్ గుర్తించలేని విధంగా సాంకేతిక పరిజ్ఞానంతో కమ్యూనికేటర్ను తయారు చేసుకుని బెట్టింగ్కు పాల్పడుతున్నారు. వీరి వెనక ఇంకా ఎవరెవరు ఉన్నారనే దానిపై దర్యాప్తు కొనసాగుతోందని ఎస్పీ తెలిపారు. నిందితుల నుంచి లక్ష రూపాయల నగదు, 34 కోట్ల రూపాయల లావాదేవీలు నడిపిన బ్యాంకు పాసు పుస్తకాలు, ఏడు ల్యాప్ టాప్లు, సెల్ ఫోన్లు, ఆరు కిలోల గంజాయి, రెండు కార్లు స్వాధీనం చేసుకున్నారు.
ప్రొద్దుటూరులో ఎక్కువగా క్రికెట్ బెట్టింగ్ నిర్వహిస్తుండగా... ఆ ప్రాంతంలో ఇంకా ఎవరెవరు క్రికెట్ బుకీలు ఉన్నారనే దానిపై పోలీసులు ఆరా తీస్తున్నారు.
ఇదీ చదవండి: కర్నూలు రోడ్డు ప్రమాద బాధిత కుటుంబాలకు రూ.5 లక్షల పరిహారం: జగన్
