కరోనా వైరస్ ప్రజలకు తీవ్ర కష్టాలు తెచ్చి పెడుతోంది. కనీసం కుటుంబ సభ్యుల మృతదేహాలను చూసేందుకు కూడా వెళ్లలేని దయనీయ పరిస్థితి నెలకొంది. కడప నగరానికి చెందిన ఓ వ్యక్తి.. గత శుక్రవారం కరోనా పరీక్షలు చేయించుకోగా... అతనికి వైరస్ సోకినట్టు తేలింది. అదే రోజు ఆ వ్యక్తిని కడప ఫాతిమా కోవిడ్ ఆసుపత్రికి తరలించారు. పదిరోజుల కిందటే ఆయన సోదరి గుండెపోటుతో మరణించింది. కుమార్తె మరణంతో... తల్లి, కుమారుడు దిగులు పడుతున్న సమయంలోనే కుమారుడికి కరోనా సోకడంతో ఆ కుటుంబంలో తీవ్ర ఆందోళన నెలకొంది.
ఆ బాధితుడు ఆసుపత్రికి వెళ్లగా... దీర్ఘకాలిక వ్యాధితో బాధపడుతున్న తల్లి కూడా మంచం పట్టింది. కూతురు మరణించిందనే దిగులు ఓ వైపు... కుమారుడికి కరోనా సోకిందనే విషయం మరోవైపు ఆ వృద్దురాలి ఆరోగ్యం ఇంకా దెబ్బతీసింది. ఈ కారణంగా.. ఆమెను కుటుంబసభ్యులు కడప రిమ్స్ కు తరలించారు. చికిత్స పొందుతూ వృద్దురాలు కూడా మరణించింది. పది రోజుల వ్యవధిలోనే ఇద్దరు కుటుంబ సభ్యులు మృత్యువాత పడటం ఆ కుటుంబంలో తీవ్ర విషాదాన్ని నింపింది.
ఇదీ చదవండి:
