సార్లూ మా ఊరికి రోడ్డు వేయండి - మంత్రి, కలెక్టర్​కు చిన్నారుల విజ్ఞప్తి

తమ ఊరికి రోడ్డు వేయాలని రంగంలోకి దిగిన పాఠశాల విద్యార్థులు - తమ బుజ్జి బుజ్జి మాటలతో మంత్రి ఆనం రామనారాయణ రెడ్డి, కలెక్టర్​కు విజ్ఞప్తి

School Students Appeal To Minister Anam And Collector To Build Road : "సార్, సార్ మా ఊరికి రోడ్డు వేయండి. స్కూలుకి వెళ్లలేక పోతున్నాం. ఫ్రెండ్స్ ఎవరూ దగ్గరకు రావటం లేదు. కాళ్లకు మొత్తం బురద అంటడంతో ఒకరి పక్కన మరొకరు కూర్చోలేక పోతున్నాం. ఇంటి నుంచి శుభ్రంగా రెడీ అయ్యి పాఠశాలకు వెళ్లే లోగా బట్టలు పాడవుతున్నాయి. చూట్టూ వర్షపు నీరు ఉండటంతో రోడ్డుపై నడవలేక పోతున్నాం. మా గోడు విని రోడ్డు వేయండి సార్" అంటూ స్కూలుకు వెళ్లే చిన్నారులు తమ బుజ్జి బుజ్జి మాటలతో మంత్రి ఆనం రామనారాయణ రెడ్డి, కలెక్టర్​కు విజ్ఞప్తి చేశారు.

రంగంలోకి దిగిన విద్యార్థులు : నెల్లూరు జిల్లా మర్రిపాడు మండలం కదిరినేనిపల్లి గ్రామంలో మట్టి రోడ్డు అధ్వానంగా మారింది. చిన్న వర్షం పడినా రోడ్లపై నీరు నిలిచి బురదమయం అవుతోంది. గుంతల్లో నీరు చేరటంతో ఎప్పుడూ దుర్వాసన వెదజల్లుతోంది. అలాగే విపరీంతగా దోమలు వృద్ధి చెంది సైర్వ విహారం చేస్తున్నాయి. దీంతో స్థానికులు తీవ్ర ఇబ్బందులు పడుతున్నారు. ఈ సమస్యపై గ్రామస్థులు ఎన్ని సార్లు అధికారులకు విజ్ఞప్తి చేసినా పట్టించుకోలేదు. దీంతో పాఠశాలలో చదివే విద్యార్థులే రంగంలోకి దిగారు. తమ గ్రామ బాధ్యతను భుజాలపై వేసుకొని జిల్లా మంత్రి ఆనం రామనారాయణ రెడ్డి, కలెక్టర్​కు తమ గొడు చెప్పుకున్నారు. తమ ఊరికి రోడ్డు వేయాలని విజ్ఞప్తి చేశారు.

కాళ్లకు చెప్పులు లేకుండా : గత వారం రోజులుగా కురుస్తున్న వర్షాలకు గ్రామంలోని మట్టి రోడ్లు మరింత దెబ్బతిన్నాయని స్థానికులు తెలిపారు. వర్షాలకు నీరు నిలిచి రోడ్లన్నీ బురదమయంగా మారాయని వాపోయారు. పిల్లలు పాఠశాలకు వెళ్లేందుకు తీవ్ర ఇబ్బందులు పడుతున్నారన్నారు. రోడ్లపై ఎక్కడ చూసినా బురద ఉండటంతో కాళ్లకు చెప్పులు తీసి నడవాల్సిన పరిస్థితి ఉందన్నారు. దీంతో పిల్లలకు రకరకాల ఇన్ఫెక్షన్లు వస్తున్నాయని మండిపడ్డారు. పాఠశాలకు వెళ్లే విద్యార్థుల అవస్థల గురించి గ్రామ సర్పంచ్, సంబంధిత అధికారులకు ఎన్నిసార్లు చెప్పినా పట్టించుకోవడం లేదని గ్రామస్థులు ఆగ్రహం వ్యక్తం చేశారు. ఇప్పటికైనా జిల్లా ప్రజాప్రతినిధులు, అధికారులు స్పందించి తమ గ్రామానికి రోడ్డు వేయాలని విజ్ఞప్తి చేస్తున్నారు.