వైద్యుల నిర్లక్ష్యం.. మహిళ మృతి...!

వైద్యులు సకాలంలో స్పందించని కారణంగా.. మహిళ మృతి చెందిందంటూ తాడేపల్లి ప్రాంతీయ ఆసుపత్రి ఎదుట బాధితులు నిరసన చేపట్టారు. సకాలంలో వైద్యం అందించకుండా నిర్లక్ష్యంగా వ్యవహరించారని వైద్యుల తీరును తప్పుబట్టారు.

వైద్యుల నిర్లక్ష్యం కారణంగానే తమ ఇంటి మహిళ మరణించిందంటూ పశ్చిమగోదావరి జిల్లా తాడేపల్లి ప్రాంతీయ ఆసుపత్రి ఎదుట బాధితులు ఆందోళన చేపట్టారు. ప్రత్తిపాడు గ్రామానికి చెందిన కుమారి.. అనారోగ్యంతో ఆసుపత్రిలో చేరిందని... విధుల్లో ఉన్న వైద్యుడు వెంటనే చికిత్స అందించకుండా 4 గంటల పాటు జాప్యం చేశాడని మృతురాలి బంధువులు ఆరోపించారు. అనంతరం నామమాత్రంగా పరీక్షలు నిర్వహించి చికిత్స అందించటం వల్లే కుమారి చనిపోయిందని ఆవేదన వ్యక్తం చేశారు. ప్రాణం విలువ తెలియని వైద్యుడిపై కఠిన చర్యలు తీసుకోవాలని డిమాండ్ చేశారు. బంధువుల ఆందోళనతో ఆసుపత్రిలో ఉద్రిక్త వాతావరణం నెలకొంది. పోలీసులు పరిస్థితిని చక్కదిద్దారు.