డబ్బులు ఇవ్వలేదని... పిల్లపై వేడి నీళ్లు పోశాడు

అదనపు కట్నం, రెండో పెళ్లి కోసం ఓ భర్త బరితెగించాడు. తల్లీబిడ్డను చిత్రహింసలు పెడుతున్నాడని పశ్చిమ గోదావరి జిల్లా పెనుగొండ మండలం ములపర్రువాసి పోలీసులకు ఫిర్యాదు చేసింది.

పశ్చిమగోదావరి జిల్లా పెనుగొండ మండలం మలపర్రు గ్రామానికి చెందిన షేక్​ నజియా, అన్వర్​ భాషాలకు ఆరేళ్ల క్రితం వివాహమైంది. ఇద్దరు పిల్లలు ఉన్నారు. అదనపు కట్నం కోసం రెండేళ్ల నుంచి భాషా వేధింపులు ఎక్కువయ్యాయి. అందులోనూ రెండో పెళ్లి చేసుకునేందుకు ఉన్న భార్యపై ఒత్తిడి తీసుకొస్తున్నాడు. ఈ విషయంపై పెనుగొండ పోలీసు స్టేషన్‌లో ఫిర్యాదు చేసిన ఎవరూ స్పందించలేదు. ఈ ఫిర్యాదుతో భర్త చిత్రహింసలు ఎక్కువయ్యాయని భార్య వాపోయింది. తనను కొట్టి... ఐదేళ్ల కుమార్తెపై వేడినీళ్లు పోశాడని కన్నీరు పెట్టుకుంది. వేధింపులు మరింత ఎక్కువైనందున జిల్లా ఎస్పీని కలిసి గోడు చెప్పుకొంది. భర్త, అత్తామామలపై చర్యలు తీసుకుని న్యాయం చేయాలని కోరింది.