ఓటర్లు పోటెత్తారు. ప్రజాస్వామ్య స్ఫూర్తిని రగిలించారు. రాష్ట్రంలోనే అత్యధికంగా విజయనగరం జిల్లాలో 84.60 పోలింగ్ శాతం నమోదు చేశారు. ఉదయం నుంచే పోలింగ్ కేంద్రాల వద్ద ఓటర్లు బారులు తీరారు. విజయనగరం డివిజన్‌లోని తొమ్మిది మండలాల్లో 207 సర్పంచి, 1719 వార్డు సభ్యుల స్థానాలకు ఎన్నికలు జరిగాయి. 642 మంది సర్పంచి, 3791 మంది వార్డు సభ్యులు బరిలో నిలిచారు. 37 సర్పంచి, 610 వార్డు స్థానాలు ఏకగ్రీవమయ్యాయి. 3,60,181 మంది ఓటర్లకు 3,13,679 మంది ఓటుహక్కు వినియోగించుకున్నారు. పూసపాటిరేగ మండలం చౌడవాడలో పోలింగ్ కేంద్రంలో ఓ అభ్యర్థితో ఓటు వేయించే విషయంలో ఏజెంట్ల మధ్య ఘర్షణ చోటుచేసుకుంది. ఒకరినొకరు దాడి చేసుకున్నారు. కుర్చీలతో కొట్టుకున్నారు. పోలీసులు వారిని బయటకు పంపడంతో వివాదం సద్దుమణిగింది.
లాటరీలో వరించిన విజయం
కొల్లాయివలస పంచాయతీలో వైకాపా బలపరిచిన అభ్యర్థిని పైడి సుజాత లాటరీలో విజయం సాధించారు. ప్రత్యర్ధి దువ్వు చిన్నమ్మలపై గెలుపొందారు. ఇక్కడ ఇద్దరికి చెరో 690 ఓట్లు వచ్చాయి. రీకౌటింగ్‌ చేసినా అదే ఫలితాలు రావడంతో అభ్యర్థు.ల ఇష్టం మేరకు లాటరీ తీయగా సర్పంచిగా పైడి సుజాత గెలిచినట్లు అధికారులు ప్రకటించారు.
ఆదర్శంగా నిలిచారు: కలెక్టర్‌
మూడో దశ ఎన్నికల్లో రాష్ట్రంలోనే అధికంగా జిల్లాలోనే పోలింగ్ జరిగిందని కలెక్టర్‌ ఎం.హరిజవహర్‌లాల్‌ తెలిపారు. జడ్పీలో ఈనాడు-ఈటీవీ భారత్తో మాట్లాడారు. ఎక్కువ సంఖ్యలో ఓటర్లు పాల్గొని ఆదర్శంగా నిలిచారని అన్నారు. ఎటువంటి అవాంఛనీయ ఘటనలు జరగకుండా, లెక్కింపు ప్రక్రియ త్వరితగతిన పూర్తిచేసేందుకు ఏర్పాట్లు చేసినట్లు చెప్పారు. జిల్లాలో పోలింగ్ సరళిని జడ్పీలోని కమాండ్‌ కంట్రోల్‌ రూం నుంచి తెలుసుకున్నారు. ఓట్ల లెక్కింపును వెబ్‌కాస్టింగ్‌ ద్వారా పరిశీలించారు. కార్యక్రమంలో సంయుక్త కలెక్టర్లు జి.సి.కిషోర్‌కుమార్‌, మహేష్‌కుమార్‌, డీపీవో కె.సునీల్‌రాజ్‌కుమార్‌, ముఖ్య ప్రణాళికాధికారిణి జి.విజయలక్ష్మి పాల్గొన్నారు.
ఓట్ల లెక్కింపును జేసీ జి.హెచ్‌.కిశోర్‌కుమార్‌ పర్యవేక్షించారు. రెండో విడతలో తలెత్తిన సమస్య పునరావృతం కాకుండా ఏకకాలంలో నాలుగైదు వార్డుల లెక్కింపు ప్రారంభించేలా చర్యలు తీసుకున్నారు. దీంతో కొన్ని పంచాయతీల్లో సాయంత్రం ఆరు గంటలకే ఫలితం వెలువడినట్లు అధికారులు వెల్లడించారు. ఆయన వెంట జడ్పీ సీీఈవో వి.వెంకటేశ్వరరావు ఉన్నారు.
ఇదీ చదవండి: పంచాయతీ పోరు: ముగిసిన మూడో విడత పోలింగ్
