ఈనెల 31న వైద్య కళాశాలకు సీఎం శంకుస్థాపన: కలెక్టర్

విజయనగరం జిల్లాలో ప్రభుత్వ వైద్య కళాశాల నిర్మాణానికి ఈ నెల 31న సీఎం జగన్ వర్చువల్ విధానంలో శంకుస్థాపన చేయనున్నారు. వైద్య కళాశాల నిర్మాణానికి విజయనగరంలోని గాజులరేగ వద్ద ప్రతిపాదించిన స్థలంలో శంకుస్థాపన ఏర్పాట్లను కలెక్టర్ హరిజవహర్ లాల్, వివిధ శాఖల అధికారులతో కలసి పరిశీలించారు. ఏర్పాట్లపై సంయుక్త కలెక్టర్ మ‌హేష్ కుమార్‌, జిల్లా రెవెన్యూ అధికారి గ‌ణ‌ప‌తిరావు, ఆర్డీవో భ‌వానీ శంక‌ర్‌, వైద్య మౌళిక స‌దుపాయాల సంస్థ ఈఈ స‌త్య‌ప్ర‌భాక‌ర్‌ కలెక్టర్​కు వివరించారు.

రూ.500 కోట్ల‌తో 70 ఎక‌రాల విస్తీర్ణంలో అత్యంత ప్ర‌తిష్టాత్మ‌కంగా విజ‌య‌న‌గ‌రంలో వైద్య క‌ళాశాల ఏర్పాట‌వుతుందని జిల్లా కలెక్టర్ హరిజవహర్ లాల్ తెలిపారు. ఇప్ప‌టికే వైద్య క‌ళాశాల నిర్మాణ సంస్థ‌ను ఖ‌రారు చేసినట్టు వివరించారు. ఈ క‌ళాశాల ప‌క్క‌నే 5 ఎక‌రాల విస్తీర్ణంలో 100 ప‌డ‌క‌ల‌ ఈఎస్​ఐ ఆసుప‌త్రిని నిర్మిస్తున్నట్టు తెలిపారు.

ఈ రెండు ఆసుప‌త్రులూ అందుబాటులోకి వ‌స్తే జిల్లా ప్ర‌జ‌ల‌కు పూర్తిస్థాయిలో సూప‌ర్ స్పెషాలిటీ వైద్య‌ సేవ‌లు అందుబాటులోకి వస్తాయని కలెక్టర్ వివరించారు. ఈ నెల 31న ఉద‌యం 11 గంట‌ల‌కు ముఖ్య‌మంత్రి జ‌గ‌న్​మోహ‌న్ రెడ్డి వ‌ర్చువ‌ల్ విధానంలో వైద్య క‌ళాశాల‌కు శంకుస్థాప చేస్తారన్నారు.

ఇదీ చదవండి: