CM Jagan Laid Foundation Stone to Central Tribal University: విజయనగరంలో కేంద్రీయ గిరిజన వర్సిటీకి శంకుస్థాపన..

CM Jagan Laid Foundation Stone to Central Tribal University: రాష్ట్రంలో నూతనంగా ఏర్పాటు చేయనున్న కేంద్రీయ గిరిజన వర్సిటీకి సీఎం జగన్, కేంద్ర మంత్రి ధర్మేంద్ర ప్రధాన్‌ శంకుస్థాపన చేశారు. అనంతరం దత్తిరాజేరు మండలం మరడాం బహిరంగసభలో పాల్గొన్న సీఎం జగన్‌.. గిరిపుత్రుల జీవితాల్లో ఈ వర్సిటీ విద్యాకాంతులు నింపుతుందని ఆకాంక్షించారు. భవిషత్తులో ఈ వర్సిటీకి.. పక్కనున్న రాష్ట్రాల నుంచి సైతం విద్యార్థులు వస్తారని కేంద్ర మంత్రి అభిప్రాయం వ్యక్తం చేశారు.

CM Jagan Laid Foundation Stone to Central Tribal University: విజయనగరం జిల్లాలో ఏర్పాటుకానున్న కేంద్రీయ గిరిజన విశ్వవిద్యాలయం గిరిపుత్రుల జీవితాల్లో విద్యాకాంతులు నింపుతుందని సీఎం జగన్‌ అన్నారు. మెంటాడ మండలం చిన్నమేడపల్లి వద్ద యూనివర్సిటీ నిర్మాణానికి.. కేంద్ర విద్యాశాఖ మంత్రి ధర్మేంద్ర ప్రధాన్‌తో కలసి ఆయన శంకుస్థాపన చేశారు. మరో మూడేళ్లలో వర్శిటీని జాతికి అంకితం చేస్తామని చెప్పారు. గిరిజన విద్యార్థుల సర్వతోముఖాభివృద్ధికి ఈ విశ్వవిద్యాలయం ఎంతగానో ఉపయోగపడుతుందని స్పష్టం చేశారు.

నాలుగేళ్ల వైసీపీ పాలనలో విద్య, వైద్యానికే పెద్దపీట వేశామని సీఎం జగన్‌ అన్నారు. విజయనగరం జిల్లా మెంటాడ, దత్తిరాజేరు మండలాల పరిధిలోని చినమేడపల్లి వద్ద 834 కోట్లతో కేంద్రీయ గిరిజన విశ్వవిద్యాలయానికి.. కేంద్ర విద్యాశాఖ మంత్రి ధర్మేంద్ర ప్రధాన్ తో కలసి సీఎం జగన్‌ శంకుస్థాపన చేశారు. అనంతరం దత్తిరాజేరు మండలం మరడాం వద్ద బహిరంగ సభలో పాల్గొన్నారు. గిరిజన విద్యార్థులు ప్రపంచంతో పోటీపడేలా విద్యావకాశాలు కల్పించామని సీఎం తెలిపారు. అందులో భాగంగానే ప్రతిష్ఠాత్మక గిరిజన వర్సిటీకి శంకుస్థాపన చేసినట్లు చెప్పారు. ఈ వర్సిటీతో గిరిపుత్రుల జీవితాల్లో విప్లవాత్మక మార్పులు వస్తాయని సీఎం ఆకాంక్షించారు.

"కేంద్ర గిరిజన విశ్వవిద్యాలయాల శాశ్వత భవనాల నిర్మాణానికి సంబంధించి పునాదులు వేస్తున్నాం. ఇది దాదాపు 830 కోట్ల రూపాయల ప్రాజెక్టు.. మరో మూడు సంవత్సరాలలో జాతీకి అంకితం చేయబోయే గొప్ప అడుగు ఈ ప్రాజెక్టు." -సీఎం జగన్​

వెనుకబడిన ఉత్తరాంధ్రలో వెలుగులు నింపేందుకు విద్యకు పెద్దపీట వేశామని సీఎం తెలిపారు. గిరిజన ప్రాంతంలోనే 2 వైద్య కళాశాలలు, ఒక గిరిజన విశ్వవిద్యాలయం, ఒక గిరిజన ఇంజినీరింగ్ కాలేజీ కనిపిస్తున్నాయని చెప్పారు. నాడు- నేడుతో గిరిజన పాఠశాలల స్ధితిగతులు మార్చామన్నారు. వర్సిటీకి భూములిచ్చిన రైతులకు 25 కోట్ల పరిహారం ఇప్పటికే చెల్లించామన్నారు. అన్ని ప్రాంతాలకు కనెక్టివిటీ ఉండే ప్రాంతంలో వర్సిటీని నిర్మిస్తున్నట్లు వివరించారు.

కేంద్రీయ గిరిజన విశ్వవిద్యాలయంలో స్కిల్ డెవలప్ మెంట్, ఒకేషనల్, జాబ్ ఓరియెంటెడ్ షార్ట్ టర్మ్ కోర్సులు ఉంటాయని..కేంద్రమంత్రి ధర్మేంద్ర ప్రధాన్‌ ఆశాభావం వ్యక్తం చేశారు. భవిషత్తులో ఈ వర్సిటీ ఏపీలోనే కాకుండా.. పక్కనున్న ఒడిశా, ఛత్తీస్‌ఘడ్ రాష్ట్రాల విద్యార్థులకు ఉపయోగపడుతుందని ఆశాభావం వ్యక్తం చేశారు.

ఈ విశ్వవిద్యాలయం నైపుణ్య, క్రీడా వర్సిటీగా.. విద్యలో నూతన పోకడలకు వేదికగా నిలవనుంది. కొద్దిరోజుల క్రితం ఒడిశాలో కేంద్రీయ విశ్వవిద్యాలయం ప్రారంభమైంది. ఇక్కడికి 100-150 కిలోమీటర్ల దూరంలో ఉంది. అది కూడా కొత్త విశ్వవిద్యాలయం. సమీప భవిష్యత్తులో ఈ రెండు వర్సిటీలను సమ్మిళితం చేసి దేశంలోని గిరిజనులంతా ఇక్కడికి వచ్చి చదువుకునేలా చేస్తామని గిరిపుత్రులకు హామీ ఇస్తున్నాను.

కేంద్రీయ గిరిజన వర్సిటీ శంకుస్థాపన సందర్భంగా సీఎం జగన్.. 4 కిలోమీటర్ల దూరానికే రెండు హెలిపాడ్లను వినియోగించారు. శంకుస్థాపన జరిగిన చినమేడపల్లి వద్ద ఒక హెలిప్యాడ్, మరడాం బహిరంగ సభ వద్ద మరో హెలిప్యాడ్‌ను అధికారులు ఏర్పాటు చేశారు. ఈ రెండింటి మధ్య దూరం కేవలం 4 కిలోమీటర్లే ఉన్నా సీఎం రోడ్డు మార్గం వినియోగించలేదు. ఇటీవల తాను పాల్గొన్న దాదాపు అన్ని కార్యక్రమాల్లోనూ... ప్రతిపక్షాలపై విరుచుకుపడ్డ సీఎం.. ఈ శంకుస్థాపన సభలో ఆ ఊసు లేకుండా కార్యక్రమం ముగించారు.