అతివేగంగా వచ్చి లారీని ఢీకొన్న ఆటో, ఎనిమిది మంది విద్యార్థులకు తీవ్ర గాయాలు- ఇద్దరి పరిస్థితి విషమం

Today Road Accidents in AP : విశాఖలో పాఠశాల విద్యార్థులు ప్రయాణిస్తున్న ఆటో అతివేగంగా ఓ లారీని ఢీకొట్టింది. ఈ ప్రమాదంలో ఇద్దరి పరిస్థితి విషమంగా ఉన్నట్లు తెలుస్తోంది. మరో వైపు ఆగి ఉన్న లారీని కారు ఢీకొట్టడంతో ఇద్దరు మృతి చెందారు. ఈ ఘటన ఎన్టీఆర్ జిల్లాలో చోటు చేసుకుంది.

Today Road Accidents in AP : విశాఖలో జరిగిన ఘోర రోడ్డు ప్రమాదంలో త్రుటిలో ప్రాణాపాయం తప్పింది. ఉదయాన్నే పాఠశాల పిల్లలను తీసుకెళ్తున్న ఆటో.. ఆర్టీసీ కాంప్లెక్స్ సమీపంలోని సంగం-శరత్‌ థియేటర్ జంక్షన్ వద్ద అతివేగంగా ఓ లారీని ఢీకొట్టింది. ఆ తీవ్రతకు ఆటో పల్టీ కొట్టగా అందులోని పిల్లలంతా పిట్టల్లా ఎగిరిపడ్డారు.

ఆటోలో ఉన్న ఎనిమిది విద్యార్థులు తీవ్రంగా గాయపడ్డారు. వీరిలో ఇద్దరి పరిస్థితి విషమంగా ఉన్నట్లు తెలుస్తోంది. స్థానిక ప్రజలు రోడ్డుపై రక్తపు మడుగులో పడి ఉన్న విద్యార్థులను దగ్గరలో ఉన్న ఓ ప్రైవేటు ఆసుపత్రికి తరలించారు. ఆటోను ఢీకొట్టిన లారీని సుమారు 100 మీటర్ల దూరం వెళ్లి ఆపారు. ఆటో అతివేగం, అటువైపు వస్తున్న లారీని చూసుకోకుండా ముందుకెళ్లడమే ఈ ప్రమాదానికి కారణమైంది. అయితే... ఘటన జరిగిన సమయంలో లారీ వాళ్లదే తప్పని భావించిన స్థానికులు డ్రైవర్, క్లీనర్‌ను పట్టుకొని పోలీసులకు అప్పగించారు.

Students Injured in Auto Overturn in Visakhapatnam : మరో ఘటనలో జిల్లాలోని మధురవాడ-నగరం పాలెం రోడ్డులో ఆటో బోల్తా పడింది. ఈ ప్రమాదంలో విద్యార్థులకు గాయాలు అయ్యాయి. పూర్తి వివరాల్లోకి వెళితే.. మధురవాడ నుంచి నగరంపాలెం వైపు వస్తున్న ఆటో అదుపు తప్పి బోల్తా పడింది. ఈ ప్రమాద సమయంలో ఆటోలో ఎనిమిది మంది విద్యార్థులు ఉండగా.. వారందరికి స్వల్పంగా గాయాలు అయ్యాయి.

Two People Died Duo to Car Collided with Lorry in NTR District : ఎన్టీఆర్ జిల్లాలో ఆగి ఉన్న లారీని కారు ఢీకొట్టింది. ఈ ప్రమాదంలో ఇద్దరు మృతి చెందారు. పూర్తి వివరాల్లోకి వెళితే.. ఇబ్రహీంపట్నం మండలం కేతనకొండ గ్రామంలో ఆగి ఉన్న లారీని కారు ఢీకొట్టింది. ఈ ప్రమాదంలో కారులో ప్రయాణిస్తున్న 8 మందిలో ఇద్దరు మృతి చెందారు. మిగిలిన వారికి తీవ్ర గాయాలు అయ్యాయి. క్షతగాత్రులను సమీపంలో ఉన్న ఓ ఆసుపత్రికి తరలించారు.

డివైడర్​ను ఢీ కొట్టి పల్టీలు కొట్టిన కారు : కృష్ణా జిల్లా ఘంటసాల మండలం లంకపల్లి సమీపంలో 216 నేషనల్ హైవేపై కారు డివైడర్​ను ఢీ కొట్టిడంతో పల్టీలు కొట్టింది. తలకిందులుగా ఉన్న కారులో ఉన్న నలుగురిని స్థానికులు సురక్షితంగా బయటకు తీసారు. కారు ముందు భాగం నుజ్జు నుజ్జు అయింది. చిన్న చిన్న గాయాలు తప్ప పెద్ద గాయాలు అవలేదని ప్రయాణికులు తెలిపారు.