రామదాసు.. బందీఖానాలో గోడలపై శ్రీరామా.. శ్రీరామా అని రాసి రాముడిని స్మరించుకున్నాడు. చత్తీస్ఘడ్లోని ఓ తెగవారు.. తమ దేహాలపైనే.. రాముడిపేరుతో పచ్చబొట్టు పొడిపించుకుని.. రాముడి సేవలో పరితపిస్తుంటారు. వారి తెగ పేరు కూడా రామ్ నామి. రాముడంటే.. వారికి పిచ్చి.. అంతకంటే ఎక్కువ భక్తి.
చత్తీస్ఘడ్ జంజీర్చాప జిల్లాలో రామ్నామి తెగ వారికి ప్రత్యేకత ఉంది. అందరూ రామకోటి రాసి.. భక్తిని చాటుకుంటే.. రామ్నామి తెగవారు మాత్రం.. రామకోటికి తమ దేహాలనే అంకింతమిచ్చారు. వాళ్లు అలా రాసుకోవడానికి ఓ చరిత్ర ఉంది. ముత్తాతల కాలం నుంచి.. వీళ్లు రాముడికి పరమ భక్తులు.
పూర్వం వీరికి ఆలయాల్లో ప్రవేశం లేదు. అలా వీరి దేహాన్నే రాముడికి అంకితమిచ్చారు. శరీరంపై.. శ్రీరామ్ శ్రీరామ్ అని పచ్చబొట్లు వేసుకుని తమ భక్తిని చాటుకుంటున్నారు. ఒక పచ్చబొట్టు వేసుకుంటేనే.. ఎంతో బాధ. అలాంటిది వీరు మాత్రం దేహం మెుత్తం రామనామమే.. ఊహించుకోండి ఎంత కష్టమో.
రామ్నామి తెగవారికి అణువణువునా రామ భక్తి ఉంటుంది. వీరు ధరించే వస్త్రాల మీద కూడా ప్రత్యేకమైన సిరాతో రామరామ అని రాసి ఉంటుంది. ప్రతి రోజు రాముడి పేరు తలచుకుంటేనే వారికి తెల్లారేది... రోజు గడిచేది. బంధువుల ఇళ్లలో ఎలాంటి కార్యం అయిన ఈ తెగవారు ప్రత్యేక భజన చేస్తారు. భజనలు ఏడాది పొడుగునా వివిధ గ్రామాల్లో జరుపుతూ.. ఉంటారు. ప్రతి ఏటా పుష్యమాసం శుక్ల ఏకాదశి నాడు మూడు రోజులపాటు మేళా నిర్వహిస్తారు. ఆ మేళాకు రాష్ట్రం నలుమూలల నుంచి ఈ తెగకు చెందిన వారు వచ్చి పాల్గొంటారు.
ఈ తెగలో మహిళలు కూడా తమ ముఖంపై పచ్చబొట్లు వేయించుకుంటారు. ఎన్నో దశాబ్దాల తరువాత అయోధ్యలో రామ మందిరం నిర్మాణానికి శంకుస్థాపన జరిగింది. అయోధ్యను సందర్శించాలనేది వీరి కోరిక.
ఇదీ చదవండి: భారతీయ సంస్కృతి ఉట్టిపడేలా రామాలయ నిర్మాణం
