తల్లీకూతుళ్లకు పింఛను కష్టం..స్పందించి సాయం చేసిన ఎమ్మెల్యే

పింఛను నిలిచిపోయిన వృద్ధురాళ్లయిన తల్లీ కుమార్తెలకు ఎమ్మెల్యే వెలగపూడి రామకృష్ణబాబు సాయం అందించారు. వారి సమస్యను కలెక్టర్ దృష్టికి తీసుకెళ్లి వెంటనే చర్యలు తీసుకోవాలని కోరారు.

ఓకే రేషన్ కార్డులో ఉన్న తల్లీకూతుళ్లకు పింఛను నిలిపివేతపై ఎమ్మెల్యే వెలగపూడి రామకృష్ణబాబు స్పందించారు. విశాఖపట్నం సింహాద్రిపురం కాలనీకి చెందిన కంటిబుక్త అప్పల నరసమ్మ (110), కంటిబుక్త లక్ష్మి (80) ఇరువురూ ఓ పూరిగుడిసెలో నివాసముంటున్నారు. అప్పల నరసమ్మ 100 రూపాయల నుంచి పింఛన్ తీసుకుంటూ వస్తోంది. కొన్నినెలలుగా వేలిముద్ర పడటం లేదని పింఛన్ ఆపేశారు. ఆమె కుమార్తె లక్ష్మికి కూడా గత నెల నుంచి పింఛను నిలిపివేశారు. ఈ సమస్యపై ఈటీవీ భారత్​-ఈనాడులలో కథనాలు రావడంతో తెదేపా ఎమ్మెల్యే వెలగపూడి స్పందించి.. వారిని పరామర్శించారు.

పింఛన్ నిలిచిపోయిన తల్లీకూతుళ్లకు ఎమ్మెల్యే వెలగపూడి సాయం అందించారు. సీఎం ఇచ్చినా ఇవ్వకపోయినా తాను పింఛన్​ డబ్బులు ఇస్తానని మాట ఇచ్చారు. అంతేగాకుండా ఈ నెల మొత్తాన్ని వారికి అందజేశారు. కలెక్టర్ దృష్టికి ఈ విషయాన్ని తీసుకెళ్లి.. పింఛను వచ్చేలా కృషి చేస్తానని తెలిపారు. ముఖ్యమంత్రి తన వ్యక్తిగత అవసరాల కోసం.. చాలామంది పింఛన్లు నిలిపివేశారని ఎమ్మెల్యే విమర్శించారు.

ఇదీ చదవండీ.. LIVE VIDEO: చేపలు పట్టేందుకు వెళ్లి వాగులో కొట్టుకుపోతున్న అతనిని..