విశాఖలో ప్రభుత్వ భూముల్లో ఆక్రమణల తొలగింపు వివాదాస్పదమైంది. దాదాపు ఐదు దశాబ్దాలుగా అక్కడే ఉంటున్నట్లు బాధితులు ఆధారాలు చూపినా.. అధికారులు మాత్రం గుడిసెలు కూల్చివేశారు. జీవీఎంసీ పరిధిలో ముడసర్లోవ ప్రాంతంలోనే కేంద్ర కారాగారం ఉంది. ఈ ప్రాంతంలోనే 1975-76లో.. ప్రభుత్వం కొంతమంది గిరిజనులకు భూములను సాగు చేసుకునేందుకు ఇచ్చింది. దాదాపు 69 కుటుంబాలకు ఇచ్చిన ఈ భూముల్లో కొంత మేర జీడిమామిడి తోటలు సైతం ఉన్నాయి. అప్పటి నుంచి చిన్న గుడిసెలు, రేకుల షెడ్డులు వేసుకొని ఉంటున్నారు.
బీఆర్టీఎస్ రహదారి అభివృద్ధి కావటం... భూముల విలువ అమాంతం పెరగటంతో.. ప్రభుత్వ భూములపై పలువురి దృష్టి పడింది. ఈ క్రమంలో... తెల్లవారుజామునే జీవీఎంసీ అధికారులు.. జేసీబీల సాయంతో గుడిసెలు, పశువుల షెడ్లు కూల్చివేశారు. ఈ భూములకు సంబంధించిన పట్టాలు తమ దగ్గర ఉన్నాయని మొత్తుకున్నా.. అధికారులు చెల్లవని చెప్పారని బాధితులు వాపోతున్నారు. ఇందిరాగాంధీ ప్రధానిగా ఉన్న సమయం నుంచి తాము ఈ ప్రాంతంలోనే ఉన్నామనీ.. ఇప్పుడు వెళ్లిపొమ్మంటే ఎక్కడకు వెళ్లాలని ప్రశ్నించారు.
అధికారులు ఏమన్నారంటే..
ప్రభుత్వ భూమిలో ఆక్రమణలు తొలగించినట్లు డిప్యూటీ సిటీ ప్లానర్ తెలిపారు. మెుత్తం 50 ఎకరాలను స్వాధీనం చేసుకున్నామన్నారు. మిగిలిన వాటిని పరిశీలిస్తున్నట్లు వివరించారు.
ఇదీ చదవండి:
