AP High Court fire on GVMC Commissioner: గ్రేటర్ విశాఖ మున్సిపల్ కార్పొరేషన్ (జీవీఎంసీ) కమిషనర్ రాజాబాబు తీరును హైకోర్టు ఆక్షేపించింది. విశాఖపట్నం జిల్లా ఎండాడ గ్రామంలో హయగ్రీవ ఫార్మ్స్, డెవలపర్స్‌కు కేటాయించిన 12.51 ఎకరాలను వెనక్కి తీసుకునేలా ప్రభుత్వాన్ని ఆదేశించాలని కోరుతూ.. దాఖలైన ప్రజాహిత వ్యాజ్యాల్లో కౌంటర్ దాఖలు వేయకుండా, కోర్టుతో దాగుడుమూతలు ఆడుతున్నారా? అని ఘాటుగా ప్రశ్నించింది. ఈ విషయంలో ఏదో జరుగుతోందని ధర్మాసనం సందేహం వ్యక్తం చేసింది. విచారణను మార్చి 1వ తేదీకి వాయిదా వేస్తూ.. ఆ రోజు జీవీఎంసీ కమిషనర్‌ను తప్పకుండా కోర్టుకు హాజరై వివరణ ఇవ్వాలని.. హైకోర్టు ప్రధాన న్యాయమూర్తి జస్టిస్ ప్రశాంత కుమార్ మిశ్ర, జస్టిస్ ఎన్. జయ సూర్యతో కూడిన ధర్మాసనం ఆదేశాలు జారీ చేసింది.
విశాఖపట్నం జిల్లా ఎండాడ గ్రామంలో హయగ్రీవ ఫార్మ్స్, డెవలపర్స్‌కు సంబంధించి సర్వే నెంబరు 92/3లో కేటాయించిన 12.51 ఎకరాలను వెనక్కి తీసుకునేలా ప్రభుత్వాన్ని ఆదేశించాలని కోరుతూ.. జనసేన కార్పొరేటర్ పీఎల్పీఎన్ మూర్తి యాదవ్, టీడీపీ మాజీ ఎమ్మెల్యే, విశాఖ టీడీపీ పార్లమెంట్ నియోజకవర్గం అధ్యక్షుడు పల్లా శ్రీనివాసరావు హైకోర్టులో ప్రజాహిత వ్యాజ్యాలు వేశారు. అయితే, విచారణకు జీవీఎంసీ తరఫున న్యాయవాది లక్ష్మీనారాయణ రెడ్డి కోర్టుకు హాజరై పిటీషనర్ల వద్ద నుంచి దస్త్రాలను తీసుకొని, వాటిని పరిశీలించి కౌంటర్ వేస్తామన్నారు. అందుకు రెండు వారాల సమయం కావాలని ధర్మాసనాన్ని కోరారు.
అనంతరం హయగ్రీవ సంస్థ తరపు న్యాయవాది రాఘవాచార్యులు ఆ అభ్యర్థనపై తీవ్ర అభ్యంతరం తెలిపారు. గత విచారణలో జీవీఎంసీ న్యాయవాది హాజరుకాలేదని తెలియజేస్తూ.. న్యాయవాది మాధవ రెడ్డి జీవీఎంసీకి స్టాండింగ్ కౌన్సిల్‌గా నియమితులయ్యారని కోర్టుకు నివేదించారన్నారు. ఆయన పేరు సైతం కేసుల విచారణ జాబితాలో ప్రచురితం అయ్యిందని గుర్తు చేశారు. ఈ రోజు మరో న్యాయవాది లక్ష్మీ నారాయణ వచ్చి.. కౌంటర్ వేసేందుకు సమయం కోరుతున్నారని కోర్టుకు వివరించారు. జీవీఎంసీ తీరు అభ్యంతరకరంగా ఉందన్నారు. వెంటనే లక్ష్మీనారాయణ బదులిస్తూ.. తనను కోర్టుకు హాజరుకావాలని కమిషనరే సూచించగా.. తాను కోర్టు ముందుకు వచ్చానన్నారు.
అనంతరం ఆ వివరాలను పరిగణనలోకి తీసుకున్న ధర్మాసనం.. జీవీఎంసీకి స్టాండింగ్ కౌన్సిల్ ఎవరో కమిషన్‌కు తెలీదా అని విస్మయం వ్యక్తం చేసింది. కోర్టుతో దాగుడుమూతలు ఆడుతున్నారా అని ప్రశ్నించింది. విచారణను మార్చి 1కి వాయిదా వేస్తూ ఆరోజు కమిషనరే స్వయంగా కోర్టుకు హాజరై.. వివరణ ఇవ్వాలని తేల్చి చెప్పింది.
ఇవీ చదవండి
