తిరుపతి జిల్లా చంద్రగిరిలో వైకాపా కార్యాలయానికి పోలీసు క్వార్టర్స్‌కు చెందిన 3 ఎకరాల స్థలం కేటాయిస్తూ ప్రభుత్వం ఉత్తర్వులు జారీ చేయడంపై విపక్షాలు మండిపడుతున్నాయి. పోలీసు స్టేషన్‌కు ఎదురుగా ఉన్న మూడున్నర ఎకరాల స్థలంలో గతంలో క్వార్టర్స్ నిర్మించారు. ఈ భవనాలు శిథిలావస్థకు చేరుకోవడంతో కూల్చివేశారు. ఈ స్థలంలో పోలీసుశాఖ ఉన్నతాధికారి కార్యాలయంగానీ, పోలీసు క్వార్టర్స్ గానీ నిర్మించాలని గత ప్రభుత్వం నిర్ణయించింది.
అయితే.. వైకాపా అధికారంలోకి వచ్చిన తర్వాత.. తుడా నిధులతో కల్యాణ మండపం, వ్యాయామశాల నిర్మిస్తామని ఎమ్మెల్యే చెవిరెడ్డి భాస్కర్‌రెడ్డి ప్రకటించారు. ఇప్పుడు ఆ ప్రతిపాదనలన్నీ పక్కకు నెట్టి, ఆ స్థలంలో వైకాపా కార్యాలయం నిర్మించాలని నిర్ణయించారు. ఏడాదికి ఎకరాకు వెయ్యి రూపాయల చొప్పున 3 ఎకరాలను 33 ఏళ్లకు అద్దెకు ఇస్తూ ఉత్తర్వులు జారీ చేశారు. దీనిపై తెలుగుదేశం, జనసేన తీవ్ర ఆగ్రహం వ్యక్తం చేశాయి. పోలీసుశాఖకు చెందిన స్థలాన్ని వైకాపాకు ధారాదత్తం చేస్తే ఊరుకునేది లేదని, అడ్డుకుంటామని జనసేన నాయకులు హెచ్చరించారు.
ఇవీ చూడండి
