బిల్లులు ఆలస్యం..టెండర్ల దాఖలుకు ముందుకు రాని గుత్తేదారులు

రహదారులు నిర్మించాలంటే గుత్తేదారులకు దడ పుట్టుకొస్తుంది. బిల్లులు సక్రమంగా వస్తాయో రావోనన్న భయం వెంటాడుతుంది. రహదారులు భవనాల శాఖ ఆధ్వర్యంలో రోడ్డు నిర్మాణానికి రెండు, మూడుసార్లు టెండర్లకు పిలిచినా, ఎవరూ దాఖలు చేయలేదు. ఫలితంగా కొత్తగా మళ్లీ టెండర్లు పిలిచేందుకు ఆ శాఖ సిద్ధం అవుతుంది.

ప్రకాశం జిల్లాలో రహదారులు, భవనాల శాఖ ఆధ్వర్యంలో గ్రామీణ, రాష్ట్ర రహదారుల నిర్వహణ, నిర్మాణాలకు ఇప్పటికి పలుమార్లు టెండర్లు పిలిచినా పనులు చేసేందుకు ఎవరూ ముందుకు రావడంలేదు. గత ఏడాది జిల్లాలో రహదారుల నిర్మాణానికి ఆర్థిక శాఖ ఆమోదం తెలిపింది. ఆ మేరకు స్పెషల్‌ రిపేర్స్‌ క్రింద ఎస్ఈ పరిధిలో 51 పనులు, ఇఎన్​సీ పరిధిలో 10 పనులు మంజూరయ్యాయి. రెండు కోట్ల రూపాయల లోపు పని ఎస్ఈ.. రెండుకోట్ల పైబడిన పనులను ఈఎన్​సీ.. ఆమోదంతో టెండర్లు పిలుస్తారు. ఈ రెండు పనుల కోసం రూ. 84.35 కోట్ల నిధులకు ఆమోదం లభించింది.

సర్కిల్‌ పరిధిలోని రహదారులకు రెండు సార్లు, ఈఎన్​సీ పరిధిలో పనులకు మూడు సార్లు టెండర్లు పిలిచినా ఎవరూ స్పందించలేదు. మొత్తం 61 రహదారుల్లో కేవలం 4 దారులకు మాత్రమే టెండర్లు దాఖలయ్యాయి. అవి కూడా ఇంకా ప్రారంభం కాలేదు. బిల్లులు సక్రమంగా వస్తాయనే నమ్మకం లేకపోవడం, గతంలో చేసిన పనులకు సైతం బిల్లులు రాక ఆర్థిక ఇబ్బందులు పడుతుండటంతో గుత్తేదారులు కొత్తపనులకు టెండర్లు వేయడంలేదని తెలుస్తుంది.

అంచనాలు మారుతున్నాయి..
గత ఏడాది పనులు గాబట్టి అదే నిధులతో ఆయా రోడ్లు పనులు ప్రారంభిస్తే అంచనాలకు తగ్గట్టు రహదారుల నిర్మాణాలు పూర్తయ్యే అవకాశం ఉండేది. కానీ ఆర్థిక సంవత్సరం ముగియడంతో కొత్త ధరలు ప్రకారం రోడ్లు నిర్మాణాలు చేపట్టాల్సి ఉంటుంది. ఈ మేరకు స్టాండర్స్‌ షెడ్యూల్‌ రేట్స్ (ఎస్.ఎస్.ఆర్) ప్రకారం అధికారులు అంచనాలు సవరిస్తున్నారు.. అయితే ఒక సారి ఆర్థిక శాఖ ఆమోదం పొంది, నగదు కేటాయింపు జరిగిన తరువాత నిర్మాణ వ్యయం పెంచడానికి నిబంధనలు అంగీకరించవు.

అందువల్ల ఒక రహదారికి కేటాయించిన నిర్మాణ వ్యయాన్ని అదే విధంగా ఉంచి, పని విలువ తగ్గిస్తారు. అంటే అవే నిధులకు , కొత్త ధరల ప్రకారం ఎంత రహదారి నిర్మాణం అయితే అంతే నిర్మిస్తారు. ఈ కారణంతో తొలిత అనుకున్న రహదారులు పొడువులు తగ్గిపోతాయి. కొత్త సవరణలు తరువాత మళ్లీ ఈ పనులన్నీటికి మరో సారి టెండర్లు పిలిచేందుకు ఆ శాఖ సిద్ధమవుతుంది. ఎన్నో ఏళ్లుగా తమ గ్రామాల మధ్య రహదారుల సౌకర్యాలు మెరుగుపడతాయని ఆశించిన ప్రజలకు ఇప్పటికీ నిర్మాణాలు ప్రారంభం కాకపోవం వల్ల నిరాశ చెందుతున్నారు.

ఆ దారులకు మాత్రం ఒకే..
కేంద్ర నిధులతో నిర్మించనున్న రెండు ప్రధాన రహదారులకు మాత్రం గుత్తేదారులు ముందుకు వచ్చారు. సీఆర్​ఎఫ్​లో రూ. 17కోట్లతో మార్టూరు- ఇంకొల్లు రహదారి, 13 కోట్ల రూపాయలతో ఓళ్లపాలెం- వేములపాడు రహదారి పనులకు పిలిచిన టెండర్లలో గుత్తేదారులు పనులు దక్కించుకున్నారు. కేంద్ర నిధులు కావునా బిల్లులు సకాలంలో వస్తాయనే నమ్మకంతో ఈ పనులకు గుత్తేదారులు టెండర్లు వేశారు. టెండర్లు అనంతరం జరగాల్సిన ప్రక్రియ జరగుతుంది. త్వరలో ఈ రెండు పనులు ప్రారంభిస్తారు. ఈ రెండు పనులను నెల్లూరు జిల్లాకు చెందిన ప్రముఖ ప్రజాప్రతినిధులు వేరే వారి పేర్ల మీద పనులు దక్కించుకున్నట్లు తెలుస్తోంది.

ఇదీ చదవండీ.. గండేపల్లిలో దొంగల హల్‌చల్‌.. పలు ఆలయాల్లో చోరీ