ఉత్తర కాలువకు అటవీ అనుమతుల సమస్యతో 42వ ఉప కాలువ నిర్మాణం ప్రారంభంలో మొదలు కాలేదు. దీంతో కాలువ అంతా తవ్వినా నిరుపయోగంగా మారింది. 112 కి.మీ. రాళ్లపాడు వరకు సాగునీరు అందించేందుకు సిద్ధమవుతోందని ఆనందించాలో, పక్కనే 100 మీటర్ల దూరంలో నీరు తరలుతున్నా బీడుగా ఉన్న పొలాలు చూసి బాధపడాలో అర్థం గాని స్థితి రైతులది. అయిదు వేల ఎకరాల ఆయకట్టు పైనే ఉన్న ఆత్మకూరు చెరువుకు ఏళ్లుగా నీటి తరలింపులో అవస్థలే. ఆత్మకూరు బ్రాంచి కాలువ నీటిని బొగ్గేరులోకి తరలిస్తారు. దీని ఆనకట్ట వరకు ఉండే కాలువ తరచూ గండ్లు పడి సాగునీరు ఇంకిపోయి.. చెరువు సజావుగా చేరవు. బొగ్గేరులో కాంక్రిట్‌ వాల్వ్‌లతో కాలువ, పైప్‌లైన్‌ నిర్మాణానికి ప్రతిపాదనలు ఉన్నా.. దశాబ్దాలుగా కార్యరూపంలోకి రావడం లేదు. ఫలితంగా జలాలు వృథా అవుతున్నాయి. రెండో పంటకు ఆత్మకూరుకు సాగునీరు విడుదల చేసినా.. ఈ కాలువపై నమ్మకం లేక సగం మంది రైతులు పొలాలు బీడుగానే వదిలేశారు.
ప్రతిపాదనలు ఆశలు తీర్చేనా
జలాశయం ఆయకట్టు అభివృద్ధి ప్రతిపాదనలు రైతుల్లోఆశలు రేకెత్తిస్తున్నాయి. రూ. 716 కోట్లతో అభివృద్ధి పనులకు ప్రభుత్వం ప్రతిపాదనలు సిద్ధం చేసింది. రూ. 650 కోట్లతో ఉత్తర కాలువ వెడల్పు చేయడం ప్రధానాంశం. కానీ, ఇప్పటికే ఒకసారి 700 క్యూసెక్కులు తరలించే స్థాయిలో వెడల్పు చేసిన ఈ కాలువను ఇంకా చేస్తామనడంపై స్పష్టత కొరవడింది. రూ.66 కోట్లతో జలాశయం పటిష్ఠం పరిచే పనులు చేయాల్సి ఉంది. ప్రత్యేక నిపుణుల కమిటీ పరిశీలన అనంతరం ఏమేమి చేపట్టాలో నిర్ణయించాల్సి ఉంది.
సోమశిలకు మహర్దశ
- కృష్ణారావు ఎస్‌ఈ
జలాశయం అభివృద్ధికి నిర్దేశించిన ప్రతిపాదనలు కార్యరూపంలోకి వస్తే ప్రాజెక్టుకు మహర్దశ వస్తుంది. రూ. 650 కోట్లతో ఉత్తర కాలువ అభివృద్ధికి ప్రతిపాదనలు పంపారు. ఈ కాలువ పరిధిలోని 1.2 లక్షల ఎకరాలు అభివృద్ధి అవుతుంది. 50 చెరువులకు నీరు మరింత మెరుగ్గా అందుతుంది. ప్రత్యేక ప్రణాళిక సిద్ధం చేశాం. డ్యామ్‌ రిహాబిలిటేషన్‌ ఇంప్రూమెంట్‌ ప్రోగ్రాం-2 పేరుతో ఈ అభివృద్ధి పనులు చేపడతారు. రెండు నెలల్లో ఈ పనుల ప్రతిపాదనలు కార్యరూపంలోకి వస్తాయి.
