పొట్టపై చురకలు వేయడమనే నాటు వైద్యం వికటించి.. ఎనిమిది నెలల బాలుడు తీవ్ర అస్వస్థతకు గురయ్యాడు. పార్వతీపురం మన్యం జిల్లాలో ఈ ఘటన చోటు చేసుకుంది. జిల్లాలోని మక్కువ మండలం ఆలుగూడ గ్రామానికి చెందిన చిన్నారికి వారం రోజుల క్రితం కడుపు నొప్పి వచ్చింది. దీంతో ఆ బాబు తల్లిదండ్రులు.. నాటువైద్యుడిని ఆశ్రయించారు. కడుపులో బల్ల ఉందని చెప్పిన ఆ వైద్యుడు.. దాన్ని కరిగించేందుకు పొట్టపై వాతలు వేశాడు అని బాబు తల్లి చెప్పింది. అయితే.. తాజాగా పొట్టపైన ఆ భాగం పుండుగా మారడంతో బాలుడిని జిల్లా ఆస్పత్రికి తరలించి చికిత్స అందిస్తున్నారు. చిన్నారి పరిస్థితి ప్రస్తుతం నిలకడగా ఉందని వైద్యులు తెలిపారు. దీంతో ఆ తల్లిదండ్రులు ఊపిరి పీల్చుకున్నారు.
గిరిజన గ్రామాల ప్రజలు.. నాటు వైద్యాన్ని ఆశ్రయిస్తూ ప్రాణాల మీదకు తెచ్చుకుంటున్నారని ఆస్పత్రి వైద్యాధికారిని వాగ్దేవి ఆందోళన వ్యక్తం చేశారు. ఆధునిక వైద్యం అందుబాటులోకి వచ్చినప్పటికీ.. ఇంకా నాటు వైద్యం చేయించడం సరికాదని ఆమె సూచిస్తున్నారు. ఏ ఆరోగ్య సమస్య వచ్చినా.. వైద్యులను సంప్రదించాలని గిరిజనులకు డాక్టర్ సూచించారు.
ఇదీ చదవండి:
