Flute maker Chilaka Mallikarjun: నంద్యాల జిల్లా నందికొట్కూరుకు చెందిన చిలకా మల్లికార్జునకు చిన్నప్పటి నుంచి సంగీతమంటే చాలా ఇష్టం. విద్యార్థి దశలో ఉన్నప్పుడే ఓ స్నేహితుడు పిల్లనగ్రోవి బహుమతిగా ఇచ్చాడు. అప్పటినుంచి నేర్చుకోవాలనే ఆసక్తి ఆయనలో పెరిగింది. ఎదుగుతున్న కొద్దీ వాటిమీద ఇష్టంతో పాటు.. నేర్చుకోవాలనే కోరిక పెరుగుతూనే వచ్చాయి. ఎన్ని వేణువులు కొన్నా.. సంతృప్తిని ఇచ్చేవి కావు. వాటిలో ఏదో లోపం కనిపించేది.
స్వరాలు సరిగ్గా పలకకపోవడం, నాణ్యతా లోపం ఉండేవి. అందుకే.. తానే తయారు చేయాలని నిర్ణయించుకున్నారు. 2005లో పీవీసీ పైపులు కొనుగోలు చేసి.. తయారు చేయడం ప్రారంభించారు. రెండేళ్లుగా అసోం నుంచి నాణ్యమైన వెదురు తెప్పించి.. వాటిని సప్త స్వరాలు పలికే అద్భుత వాద్యంగా తీర్చిదిద్దుతూ... వాటికి వెన్నెల అని పేరు పెట్టారు. ఎందుకంటే బరువెక్కిన హృదయం కూడా సంగీతం వింటే తేలికవ్వాల్సిందే.. వెన్నెలలో తేలిపోవాల్సిందే కదా.. అందుకే ఆ పేరు పెట్టారు.
ఫ్లూట్స్‌ తయారు చేయడం ప్రారంభించిన తక్కువ సమయంలోనే.. మంచి గుర్తింపు వచ్చిందని మల్లికార్జున ఆనందం వ్యక్తం చేస్తున్నారు. మొదట వెదురును బాగా పరీక్షించి.. ఆ వెదురు సరిపోతుందనుకుంటేనే తయారీ మొదలుపెడతారు. బాగా పాలిష్ పట్టి ఆయిల్ ట్రీట్మెంట్, హీట్ ట్రీట్మెంట్ ఇస్తారు. తర్వాత రంధ్రాలు చేస్తారు. చివరికి పిల్లనగ్రోవి తయారైన తర్వాత స్వరాలు బాగా పలికితేనే వాటిని విక్రయిస్తారు.
తయారీలో మల్లికార్జున సతీమణి సుజాత చేదోడుగా నిలుస్తున్నారు. సాధారణంగా ఒక పిల్లనగ్రోవి తయారీకి ఒకరోజు సమయం పడుతుంది. నిరంతరం భర్త కష్టాన్ని చూసి.. తన వంతు సాయంగా వాటికి పాలిష్ పెట్టడం నేర్చుకున్నారు సుజాత. ఈ తయారీ విధానం తనతోనే అంతరించిపోకుండా.. కుమారుడికి ఈ విద్య నేర్పుతానని మల్లికార్జున చెబుతున్నారు.
ఇవీ చదవండి:
