ఆర్థికంగా నిలదొక్కుకోవాలన్నా... కుటుంబాన్ని నడిపించాలన్నా.. ప్రస్తుత సమాజంలో ఒక్కరి సంపాదనతో సాధ్యమయ్యే పనికాదు. మధ్యతరగతి కుటుంబాల్లో భార్యాభర్తలిద్దరూ సంపాదిస్తేనే గానీ.. కాలంతో పాటు పరిగెత్తలేరు. ఆర్థిక అవసరాలు తీర్చుకోలేరు. ఈ కారణంతోనే.. భర్తతో పాటు.. భార్య కూడా ఉద్యోగానికి వెళ్తుండడం ఈ కాలంలో మామూలైపోయింది. ఇదే సమయంలో.. కుటుంబ బాధ్యతల కోసం ఉద్యోగాన్ని మధ్యలో వదిలేస్తున్న మహిళల సంఖ్యా పెరుగుతోంది. ఇంకొందరు మహిళలైతే.. ఉద్యోగం చేసేందుకు అనుకూల పరిస్థితులు లేక.. కుటుంబం కోసం ఇంటికే పరిమితం అవుతున్నారు. ఇలాంటి వారి కోసమే.. కృష్ణా జిల్లా విజయవాడలోని వాసవ్య మహిళా మండలి విశేష కృషి చేస్తోంది. మహిళల్లో దాగి ఉన్న ప్రతిభను వెలికితీస్తోంది. స్వయం ఉపాధి అవకాశాలు కల్పిస్తూ ఆర్థిక స్థిరత్వాన్ని పొందేందుకు దారి చూపిస్తోంది.
తీరిక సమయాలు.. ఉపాధికి బాటలు
స్క్రీన్ ప్రింటింగ్, ఎంబ్రాయిడరీ, అల్లికలు, ఫ్యాబ్రిక్ పెయింటింగ్, త్రెడ్ జ్యూయలరీ.. ఇలా.. మహిళలు ఉత్సాహం చూపే ఎన్నో విషయాల్లో వాసవ్య సంస్థ శిక్షణ ఇప్పిస్తోంది. ఇంట్లోనే ఉంటూ.. తీరిక సమయాల్లోనే పని చేసుకునేందుకు అవసరమైన ప్రోత్సాహాన్ని.. నైపుణ్యాన్ని అందిస్తోంది.
అందుబాటు సమయాల్లోనే శిక్షణ
హడావుడిగా శిక్షణ ఇవ్వడం కాకుండా.. మహిళల అనుకూలతలు, వారికి ఉండే వెసులుబాటు ఆధారంగా వాసవ్య మహిళా మండలి నిర్వాహకులు.. శిక్షణ కార్యక్రమాలు నిర్వహిస్తున్నారు. ఉదాహరణకు.. టైలరింగ్ కోర్సు తీసుకుంటే.. త్వరగా నేర్చుకునే వీలున్న వారికి 15 రోజుల నుంచి నెలపాటు శిక్షణ ఇస్తారు. ఇది వీలు కాని వారికి 2 నెలల నుంచి 3 నెలల పాటు శిక్షణ ఇస్తారు. ఇలా.. నేర్చుకున్న వారంతా.. తదుపరి బ్యాచ్లకు ట్రైనింగ్ ఇస్తారు.
రూరల్ మార్ట్ వేదికగా అమ్మకాలు.. లాభాలే లాభాలు
స్వయం ఉపాధి కోసం శిక్షణ తీసుకోవడం ఒక ఎత్తైతే... ఇంటి వద్ద తయారు చేసిన ఉత్పత్తులను విక్రయించడం మరో ఎత్తు. నాబార్డ్ సహకారంతో వాసవ్య మహిళా మండలి రూరల్ మార్ట్ ను ఏర్పాటు చేసింది. ఇక్కడ శిక్షణ పొందిన మహిళలు... వాళ్లు తయారు చేసిన బ్యాగులు, ఆభరణాలు, సౌందర్య సాధనాలు, వస్త్రాలు, గృహోపకరణ వస్తువులు ఈ మార్ట్ ద్వారా ఎప్పుడైనా విక్రయించుకోవచ్చు. మంచి లాభాలూ పొందొచ్చు.
ఇలా... ఎంతోమంది మహిళలకు ఉపాధి బాట చూపిస్తూ... వారిలో ఆత్మవిశ్వాసాన్ని ప్రోది చేస్తున్న వాసవ్య లాంటి సంస్థలు.. మరిన్ని రావాల్సిన అవసరం ఉంది.
