Carbon Credit Trading Scheme : పర్యావరణ పరిరక్షణ, గ్రీన్ హౌస్ వాయువుల ప్రభావం తగ్గించేందుకు కార్బన్ క్రెడిట్ ట్రేడింగ్ స్కీమ్ లో భారత ప్రభుత్వానికి ఏపీ పూర్తి తోడ్పాటును ఇస్తుందని సీఎస్ కేఎస్ జవహర్ రెడ్డి స్పష్టం చేశారు. వ్యక్తులు, సంస్థలు, ప్రభుత్వాలు, కంపెనీలు... ఇలా ఎవరైనా కార్బన్ వాయువులను విడుదలను నియంత్రించుకుని కార్బన్ క్రెడిట్ ట్రేడింగ్ లో పాల్గొనవచ్చని ఆయన వెల్లడించారు. తద్వారా పర్యావరణ రక్షణకు పాటుపడవచ్చని తెలిపారు. ఏపీ ఇంధన పొదుపు మిషన్ కార్యక్రమాలపై ఆయా శాఖల ఉన్నతాధికారులతో సమీక్ష నిర్వహించిన సీఎస్.. ప్రస్తుతం వివిధ మార్గాల ద్వారా ఏపీలో 17 వేల మిలియన్ యూనిట్ల విద్యుత్ ఆదా చేస్తున్నట్టు తెలిపారు. ఏపీ ఉత్పాదక సామర్థ్యంలో ఇది 25 శాతంగా ఉందని ఆయన వెల్లడించారు. ఇంధన పొదుపును మరింతగా ప్రోత్సహించి ఏడాదికి మరో 1700 మిలియన్ యూనిట్లను ఆదా చేయాలని భావిస్తున్నామని వెల్లడించారు. దాని విలువ కనీసం రూ.1200 కోట్ల వరకు ఉంటుందని సీఎస్ తెలిపారు.
మార్గదర్శకాలు విడుదల... ఇంధన పొదుపు లక్ష్యాలను సాధించేందుకు ప్రభుత్వ శాఖలన్నిటికీ మార్గదర్శకాలు విడుదల చేస్తామన్నారు. అలాగే వివిధ ప్రభుత్వ శాఖల్లో విద్యుత్ పొదుపు ద్వారా 6.68 మిలియన్ టన్నుల ఇంధనాన్ని కూడా ఆదా చేయాలన్నది కేంద్ర ప్రభుత్వం లక్ష్యంగా విధించినట్టు వివరించారు. మరోవైపు తిరుమల తిరుపతి దేవస్థానంలో విద్యుత్ ఆదా చేసేందుకు 400 బీఎల్డీసీ ఫ్యాన్లు, 1000 ఎల్ఈడీ వీధి దీపాలు బిగించామని... తద్వారా 1.64 లక్షల యూనిట్లు ఆదా అవుతున్నట్టు అధికారులు సీఎస్ కు వివరించారు. త్వరలోనే ఏపీ ఇంధన పొదుపు మిషన్ ద్వారా ఎకో నివాస్ సంహిత కార్యక్రమం ద్వారా నివాస గృహాల్లో విద్యుత్ ఆదా చేసే ఉపకరణాల వినియోగం, విద్యుత్ పొదుపు చర్యలపై కార్యాచరణ చేపట్టినట్టు అధికారులు తెలిపారు.
గ్రీన్ హౌస్ ఎఫెక్ట్... ప్రపంచీకరణ, పారిశ్రామికీకరణ, నగరీకరణ పెరిగిన ఫలితంగా అడవుల శాతం గణనీయంగా తగ్గుతోంది. థర్మల్ విద్యుత్ ఉత్పత్తి, పెట్రోల్, డీజిల్ వాహనాల వాడకం ఫలితంగా వాతావరణ కాలుష్యం పెరిగిపోతోంది. గాలిలోకి కార్బండయాక్సైడ్, మీథేన్, నైట్రస్ ఆక్సైడ్, క్లోరో ఫ్లోరో కార్బన్ లాంటి విషపూరిత వాయువులు విడుదలవుతున్నాయి. ఈ హానికారక వాయువులను గ్రీన్ హౌస్ ఎఫెక్ట్ అంటారు. దీని ఫలితంగా ప్రకృతి విపత్తులు ఏర్పడుతున్నాయి. మంచు కొండలు కరగడంతో పాటు, అడవుల దహనం వంటి అనూహ్య పరిణామాలు చోటుచేసుకుంటున్నాయి.
యూఎఫ్సీసీ ఏర్పాటుతో... ఈ నేపథ్యాన సమస్య పరిష్కారం కోసం ఐక్య రాజ్య సమితి యున్ఎఫ్సీసీ ఏర్పాటు చేసింది. కార్బన్ ఎఫిషియన్సీ తగ్గించడానికి 1977 సంవత్సరంలో జపాన్ దేశంలోని క్యోటో నగరంలో సమావేశం ఏర్పాటు చేయగా... 160 దేశాల ప్రతినిధులు పాల్గొన్నారు. ఈ సమావేశంలో క్యోటో ప్రొటో కాల్ రూపొందించారు. తద్వారా ప్రతీ దేశానికి సంబంధించి కార్బన్ లిమిట్ రూపొందించారు. దీనినే కార్బన్ ట్రేడింగ్ అని పిలుస్తున్నారు. విండ్, సోలార్ పవర్, ఎలక్ట్రిక్ పవర్ వాడడం వల్ల వాతావరణ కాలుష్యాన్ని తగ్గించే వీలుంది. ఒక టన్ను కార్బన్ డయాక్సైడ్ తగ్గిస్తే ఒక కార్బన్ ట్రేడింగ్ సర్టిఫికెట్ ఇస్తారు. ఆయా క్రెడిట్స్.. ఇతర దేశాలకు విక్రయించి ఆదాయాన్ని పొందవచ్చు. మన దేశం ప్రస్తుతానికి 30 మిలియన్ల కార్బన్ క్రెడిట్స్ కలిగి ఉంది.
ఇవీ చదవండి :
