పాల సేకరణ ధరను లీటరుకు రూ.5 పెంచుతూ.. నిర్ణయం తీసుకున్నట్లు కృష్ణా మిల్క్ యూనియన్ ఛైర్మన్‌ చలసాని ఆంజనేయులు తెలిపారు. కరోనా నిబంధనలను అనుసరించి వీడియో కాన్ఫరెన్స్ ద్వారా పాలకమండలి సమావేశం నిర్వహించారు. ప్రస్తుతం పాల సేకరణ ధర లీటరుకు రూ.65 ఉండగా, రూ.70కు పెంచుతూ నిర్ణయం తీసుకున్నామన్నారు.
రైతుల సంక్షేమం కోసం పెంచిన పాల ధర.. మే 1 నుంచి అమల్లోకి వస్తుందన్నారు. రెండేళ్ల కాలంలో రూ.14 పెంచామన్నారు. దేశంలో ఏ మిల్క్ డైరీ ఇవ్వని రేటును పాల రైతుల సంక్షేమం కోసం.. కృష్ణా మిల్క్ యునియన్ అందిస్తోందన్నారు.
కరోనా ప్రభావంతో ప్రజలు అనేక ఇబ్బందులు పడుతున్నారని.. పాడిరైతులకు బాసటగా నిలిచేందుకు ఈ నిర్ణయం తీసుకున్నట్లు తెలిపారు. ధరల పెంపు వల్ల వార్షికంగా రూ.34 కోట్ల రూపాయలు అధిక భారం పడుతుందని.. అయినా రైతు సంక్షేమం దృష్ట్యా ఈ నిర్ణయం తీసుకున్నట్లు చలసాని ఆంజనేయులు తెలిపారు. 2020-2021 ఆర్ధిక సంవత్సరంలో.. 15 శాతం వృద్ది రేటుతో రూ.920 కోట్ల వార్షిక టర్నోవర్ సాధించామని ఆయన తెలిపారు.
ఇదీ చదవండి: రాష్ట్రానికి వర్ష సూచన... 3 రోజులపాటు మోస్తరు వర్షం
