రాష్ట్రంలో కరోనా అదుపులోకి రావడం లేదు. రోజువారీ కేసులు, మరణాలు ఎన్నడూ లేని రీతిలో పెరిగిపోతున్నాయి. ప్రభుత్వం, యంత్రాంగం ఎప్పటికప్పడు నియంత్రణ చర్యలు చేపడుతున్నా.. వైరస్ వ్యాప్తి అదుపులోకి రావడంలేదు. విశాఖ జిల్లా అనకాపల్లికి చెందిన తెలుగుదేశం కార్యకర్త కొణతాల తులసి... కరోనాతో విశాఖ ఆసుపత్రిలో చికిత్స పొందుతూ కన్నుమూశారు. రెండ్రోజుల క్రితమే ఆయన తల్లి వెంకట సూర్య అప్పల నరసమ్మ కొవిడ్ కారణంగా చనిపోయారు. అనకాపల్లికి చెందిన సీనియర్ పాత్రికేయులు.. రాపర్తి వెంకట్రావు కరోనా చికిత్స పొందుతూ.. ఎన్టీఆర్‌ ఆస్పత్రిలో తుదిశ్వాస విడిచారు.ఐఎస్డబ్ల్యూలో ఎస్పీగా విధులు నిర్వర్తిస్తున్న శ్రీరాంప్రసాద్‌.. కరోనా చికిత్స పొందుతూ... విజయవాడలోని ఓ ఆసుపత్రిలో చనిపోయారు.
గుంటూరు సర్వజనాసుపత్రి వైద్యుడు రాంబాబు కరోనాతో మృతిచెందారు. గుంటూరు జీజీహెచ్లో చికిత్స అనంతరం హైదరాబాద్‌ తరలించగా.. ఓ ప్రైవేట్‌ ఆస్పత్రిలో చికిత్స పొందుతూ కన్నుమూశారు. తెనాలికి చెందిన ఉపాధ్యాయుడు.. శరత్‌బాబు కరోనా చికిత్స పొందుతూ.. గుంటూరులోని ఓ ప్రైవేటు ఆసుపత్రిలో మృతిచెందారు. అనంతపురం జిల్లా కదిరిలో కరోనాతో మరణించిన కిరణ్‌కుమార్‌ అనే వ్యక్తి అంత్యక్రియలు నిర్వహించి స్థానిక యువకులు ఉదారత చాటుకున్నారు. లాక్‌డౌన్‌ వల్ల కుటుంబసభ్యులు రాలేని పరిస్థితుల్లో.. దిక్కుతోచక రోదిస్తున్న మృతుడి భార్యను గమనించిన యువకులు... దగ్గరుండి అంత్యక్రియలు జరిపించారు. కడప యోగి వేమన విశ్వవిద్యాలయం జంతుశాస్త్ర శాఖ పరిశోధక విద్యార్థిని డాక్టర్ ఆశా కిరణ్ కిరణ్కి కరోనా సోకి మృతి చెందారు. ఈమె మృతిపై ఉపకులపతి ఆచార్య మునగాల సూర్య కళావతి సంతాపం తెలిపారు. విశాఖ పురపాలక సంఘ కమిషనర్ పనిచేసిన వేగి సత్యనారాయణ కరోనాతో మృతి చెందారు. తూర్పుగోదావరి జిల్లా రావులపాలెనికి చెందిన ప్రభుత్వ ఉపాధ్యాయుడు తుట్టగుంట కృష్ణ శర్మ ఘగర్తో చనిపోయాడు.
శ్రీకాకుళం జిల్లా టెక్కలికి చెందిన వైకాపా నేత.. దేవాది గోపి కుమారుడు.. శివాజీ జ్వరం, శ్వాస సంబంధిత సమస్యతో శ్రీకాకుళం ఆసుపత్రిలో గురువారం మృతిచెందాడు. వైద్యుల నిర్లక్ష్యం వల్లే తమ కుమారుడు మరణించాడని కుటుంబసభ్యులు ఆరోపించారు. ఆసుపత్రి వైద్యాధికారిపై మృతుడి బంధువులు కర్రలు, రాళ్లతో దాడిచేశారు. విజయనగరం జిల్లా ఎస్.కోట మండలం కొట్టాంలో.. కరోనా పాజిటివ్‌ తేలిందన్న ఆందోళనలో ఓ వ్యక్తి పంటలకు వేసే మందు గుళికలు తిని... ఆత్మహత్య చేసుకున్నాడు.
విజయవాడ నగరంలో కరోనా కేసులు ఆందోళన కలిగిస్తున్నాయి. రోజువారీ కూలీలు ఉండే 110 మురికివాడల్లో కేసులు అధికంగా నమోదవుతున్నాయని అధికారులు గుర్తించారు. కేసులు వస్తున్న ప్రాంతాలు, రోగుల ఇళ్లను నగరపాలక సిబ్బంది శానిటైజ్ చేస్తున్నారు. కొవిడ్ సోకిన వ్యక్తి ఇంట్లో, చుట్టుపక్కల ప్రాంతాల్లోనూ... హైపోక్లోరైడ్‌ ద్రావణాన్ని పిచికారీ చేస్తున్నారు. వీధుల్లో బ్లీచింగ్‌ పౌడర్ చల్లుతున్నారు. గుంటూరు జిల్లా మంగళగిరి తాడేపల్లి కార్పొరేషన్‌లో.. కరోనాకు అడ్డుకట్ట వేసేందుకు.. కంటైన్మెంట్ జోన్‌ల సంఖ్య పెంచారు. మంగళగిరిలోని 32, తాడేపల్లిలోని 20 వార్డులతో ఉన్న మైక్రో కంటైన్మెంట్ జోన్లను... పూర్తిస్థాయి కంటైన్మెంట్ జోన్లుగా ప్రకటించారు.
కర్నూలు జిల్లా ఆదోనిలో ఇవాళ్టి నుంచి మినీ లాక్‌డౌన్‌ విధిస్తున్నట్లు.. అధికారులు ప్రకటించారు. ఉదయం 6 నుంచి మధ్యాహ్నం 2 వరకు మాత్రమే దుకాణాలకు అనుమతి ఉంటుందని తెలిపారు. చిత్తూరు జిల్లాలో కొవిడ్ నిర్ధరణ పరీక్షల్ని మరింత పెంచాలని కలెక్టర్ హరినారాయణ్‌ వైద్య అధికారుల్ని ఆదేశించారు. ప్రకాశం జిల్లా చీరాలలో.. 14 కంటైన్మెంట్ జోన్లు ఏర్పాటుచేశారు. ఆయా ప్రాంతాల్లో రాకపోకలు నిషేధిస్తూ.. కంచెలు వేశారు.
ఇవీ చదవండి
