దేశవ్యాప్తంగా ఐటీ తనిఖీలు జరుగుతుంటే వైకాపా ప్రభుత్వం తెదేపాకి అంటకడుతుందని మాజీ ఎమ్మెల్యే బోండా ఉమామహేశ్వరరావు ధ్వజమెత్తారు. చంద్రబాబు మాజీ పీఎస్‌ శ్రీనివాస్ ఇంటిపై ఐటీ రైడ్స్ జరిగినప్పుడు ఆయన ఇంట్లో 70 లేదా 80 వేల నగదు మాత్రమే దొరికితే... 2000 వేల కోట్ల రూపాయలు దొరికాయని వైకాపా నేతలు ప్రచారం చేస్తున్నారని తీవ్రస్థాయిలో మండిపడ్డారు. అసలు ఇన్కమ్ ట్యాక్స్ అంటే అర్ధం తెలుసా అని ప్రశ్నించారు. ఐటీ తనిఖీలకు తెదేపాకి సంబంధం లేదని బోండా ఉమా స్పష్టం చేశారు. రెండు లక్షల కోట్లు చంద్రబాబు అవినీతికి పాల్పడ్డారని ప్రతిపక్ష నేతగా ఉన్నప్పుడు జగన్ ఆరోపించారనీ, అధికారంలోకి వచ్చి 9 నెలలు గడుస్తున్నా... 9 రూపాయల అవినీతి అయినా నిరూపించగలిగారా అని నిలదీశారు. అవినీతి మరకలను తెదేపా, చంద్రబాబుకు అంటించాలని సీఎం ప్రయత్నిస్తున్నారని ఆక్షేపించారు. అవినీతి పునాదులపై పుట్టింది వైకాపా పార్టీ అని బోండా ఉమా విమర్శించారు.
ఇదీ చదవండి: ఒక్కో ఎమ్మెల్యే రూ. 500 కోట్లు సంపాదించాలనే లక్ష్యంతో ఉన్నారు : సునీల్ దియోధర్
