విజయవాడ నూతన సీపీగా బత్తిన శ్రీనివాసులు

రాష్ట్రంలో భారీ ఎత్తున చేపట్టిన ఐపీఎస్‌ అధికారుల బదిలీల్లో భాగంగా విజయవాడ పోలీస్‌ కమిషనర్‌గా పనిచేస్తున్న సీహెచ్‌ ద్వారకా తిరుమలరావు రైల్వే డీజీపీగా బదిలీ అయ్యారు. ఆయన స్థానంలో విజయవాడ కమిషనరేట్‌ పరిధిలో అదనపు సీపీగా పనిచేస్తున్న బి. శ్రీనివాసులును నియమిస్తూ శనివారం ఆదేశాలు జారీ అయ్యాయి.

విజయవాడ నూతన పోలీస్ కమిషనర్​గా బి. శ్రీనివాసులు నియమితులయ్యారు. ఇప్పటివరకూ ఆ స్థానంలో ఉన్న ద్వారకా తిరుమలరావు... రైల్వే డీజీపీగా బదిలీ అయ్యారు.

ప్రకాశం జిల్లాకు చెందిన బత్తిన శ్రీనివాసులు 1998 బ్యాచ్‌కి చెందిన అధికారి. గ్రూపు-1 అధికారిగా పోలీసు శాఖలోకి ప్రవేశించిన ఆయన పదోన్నతిపై వివిధ బాధ్యతలను నిర్వర్తించారు. నల్గొండ, తూర్పుగోదావరి జిల్లాల ఎస్‌పీగా పనిచేశారు. హైదరాబాద్‌లో కౌంటర్‌ ఇంటెలిజెన్స్‌ డీఐజీగా బాధ్యతలు నిర్వర్తిస్తూ 2013లో విజయవాడ పోలీస్‌ కమిషనర్‌గా వచ్చి.. దాదాపు 15నెలలు పనిచేశారు. ఆ తర్వాత ఎస్‌ఐబీ(స్పెషల్‌ ఇంటెలిజెన్స్‌ బ్యూరో) డీఐజీగా, ఏపీఎస్పీ బెటాలియన్‌ ఐజీగా ఉన్నారు. ఈ ఏడాది జనవరి 18వ తేదీన నగర కమిషనరేట్‌ పరిధిలో కొన్నాళ్ల నుంచి ఖాళీగా ఉన్న అడిషనల్‌ సీపీ పోస్టులో నియమితులయ్యారు.

2018 జులై 19వ తేదీ విజయవాడ సీపీగా బాధ్యతలు చేపట్టిన ద్వారకా.. పాలనపై తనదైన ముద్ర వేశారు. ట్రాఫిక్‌ సమస్య పరిష్కారానికి శ్రద్ధ చూపారు. దుర్గమ్మ ఆలయంలో దసరా ఉత్సవాల నిర్వహణలో తనదైన పనితీరు చాటుకున్నారు. సీపీకి ఆర్థికాధికారాలు ఉండేటట్లు చేశారు. ప్రజా సమస్యలపై వెంటనే స్పందించేందుకు వాట్సాప్‌ నెంబరు 73289 09090 ను ప్రారంభించారు. ఏదైనా ఘటన జరిగితే వెంటనే అక్కడకు చేరుకునేందుకు ‘ఇంటర్‌సెప్టర్‌’ వాహనాలను ప్రారంభించారు. స్త్రీల రక్షణ కోసం తీసుకొచ్చిన ‘శక్తి’ బృందాన్ని రాష్ట్రంలోనే తొలిసారిగా ఇక్కడే అంకురార్పణ జరిగింది. నేర విభాగాన్ని ప్రక్షాళన చేయటంతో అట్టడుగున ఉన్న రికవరీ శాతం బాగా పెరిగింది. సైబర్‌ మిత్ర పేరుతో విద్యార్థులు, ప్రజలకు అవగాహన కల్పించారు. నేరాలపై ప్రజలకు, పోలీసు సిబ్బందికి అవగాహన కల్పించేందుకు ‘'చేరువ'’ అనే మాసపత్రికను సొంతంగా ప్రారంభించారు.

రైల్వే ఎస్పీగా విజయారావు

గుంటూరు రూరల్‌ ఎస్పీగా పనిచేస్తున్న సీ.హెచ్‌.విజయారావు విజయవాడ డివిజన్‌ రైల్వే ఎస్పీగా రానున్నారు. ఇప్పటివరకు ఇక్కడ విధులు నిర్వర్తిస్తున్న నారాయణ నాయక్‌ను పశ్చిమగోదావరి జిల్లా ఎస్పీగా బదిలీ చేస్తూ రాష్ట్ర ప్రభుత్వం శనివారం ఉత్తర్వులు జారీ చేసింది. 2010 ఐపీఎస్‌ అధికారి అయిన విజయారావు 2019 అక్టోబర్‌లో గుంటూరు రూరల్‌ ఎస్పీగా బాధ్యతలు స్వీకరించారు. మొదట రంపచోడవరంలో ఓఎస్‌డీగా విధులు నిర్వహించిన ఆయన.. గుంటూరు అర్బన్‌లో రెండేళ్లు పనిచేశారు. అనంతరం విజయవాడ డీసీపీ-2గా వచ్చారు. ఇక్కడకు వచ్చిన 4 నెలల్లోనే మళ్లీ గుంటూరు రూరల్‌ ఎస్పీగా బదిలీపై వెళ్లారు. అంతకు ముందు గ్రేహౌండ్స్‌ ఎస్పీ, ఏపీఎస్పీ కమాండెంట్‌గా పనిచేశారు.

ఇవీ చదవండి... రామాలయ ధ్వజస్తంభం చుట్టూ శునకం ప్రదక్షిణలు