మంత్రులు, ఎమ్మెల్యేల ఇళ్లను ముట్టడించిన అంగన్వాడీలు - పలుచోట్ల ఉద్రిక్తత

Anganwadis Agitation in Andhra Pradesh: రాష్ట్రవ్యాప్తంగా అంగన్వాడీలు నిర్వహిస్తున్న ఆందోళనలు కొన్నిచోట్ల ఉద్ధృతంగా మారాయి. మంత్రులు, అధికార పార్టీ ఎమ్మెల్యేలు, నేతల ఇళ్ల ముట్టడికి అంగన్వాడీలు పూనుకోగా అందోళన తీవ్రరూపం దాల్చింది. ఈ నేపథ్యంలో పోలీసులు అంగన్వాడీలను ఎక్కడికక్కడ అడ్డుకున్నారు. పోలీసులు అడ్డుకునే క్రమంలో పోలీసులకు, అంగన్వాడీలకు మధ్య తోపులాటలు చోటు చేసుకున్నాయి.

Anganwadis Agitation in Andhra Pradesh: పక్షం రోజులుగా శాంతియుతంగా నిరసన తెలిపిన అంగన్వాడీలు, ఒక్కసారిగా జూలు విదిల్చారు. ప్రభుత్వంతో జరిపిన చర్చలు విఫలమవ్వడంతో మంత్రులు, అధికార పార్టీ ఎమ్మెల్యేలు, నేతల ఇళ్లు ముట్టడించారు. సీఎం జగన్ ఇచ్చిన హామీలు నెరవేర్చాలంటూ ఆందోళనకు దిగారు. కొన్నిచోట్ల పోలీసులు అంగన్వాడీలను అడ్డుకోవడంతో స్వల్ప ఉద్రిక్తతలు చోటు చేసుకున్నాయి. తమ సమస్యలు పరిష్కరించాలంటూ ర్యాలీగా ఇళ్ల వద్దకు వెళ్లిన అంగన్వాడీలు అక్కడే బైఠాయించి నినాదాలతో హోరెత్తించారు. పలుచోట్ల అంగన్వాడీలను పోలీసులు అడ్డుకోవడంతో ఉద్రిక్తతకు దారి తీసింది.

సమస్యలు పరిష్కరించాలని డిమాండ్ చేస్తూ 16 రోజులుగా ఆందోళన చేస్తున్న అంగన్వాడీలు సమ్మెను మరింత ఉద్ధృతం చేశారు. నెల్లూరులో మంత్రి కాకాణి గోవర్ధన్‌రెడ్డి నివాసాన్ని అంగన్వాడీలు ముట్టడించారు. మంత్రి ఇంట్లో లేకపోవడంతో అక్కడే బైఠాయించి ప్రభుత్వానికి వ్యతిరేకంగా నినదించారు. నెల్లూరు జిల్లా అంగన్వాడీల ఆందోళనలో విషాదం చోటు చేసుకుంది. ఆత్మకూరులో నిరసన కార్యక్రమానికి వెళ్తుండగా అంగన్వాడీ కార్యకర్త వనమ్మ గుండెపోటుతో తుదిశ్వాస విడిచారు.

ఒంగోలులో కలెక్టరేట్ నుంచి ఎమ్మెల్యే బాలినేని శ్రీనివాసరెడ్డి నివాసం వరకు అంగన్వాడీలు ర్యాలీ నిర్వహించారు. బాలినేని నివాసంలోకి వెళ్తుండగా పోలీసులు ఆంగన్వాడీలను అడ్డుకున్నారు. ఈ క్రమంలో వారిమధ్య వాగ్వాదం చోటుచేసుకుంది. ప్రకాశం జిల్లా యర్రగొండపాలెంలో మంత్రి సురేష్, మార్కాపురంలో ఎమ్మెల్యే నాగార్జునరెడ్డి ఇళ్లను అంగన్వాడీలు ముట్టడించారు. మంత్రి సురేశ్​ ఇంట్లో లేకపోవడంతో ఇంటి గేటుకు వినతిపత్రం కట్టి వెళ్లి పోయారు.

ఉమ్మడి అనంతపురం జిల్లాల్లో అంగన్వాడీల ఆందోళన ఉద్ధృతంగా సాగుతోంది. అనంతపురం శ్రీలక్ష్మినగర్‌లోని శింగనమల వైసీపీ ఎమ్మెల్యే జొన్నలగడ్డ పద్మావతి ఇంటి వద్ద అంగన్వాడీలు బైఠాయించి ఆందోళన నిర్వహించారు. వినతిపత్రం తీసుకోవాలని అంగన్వాడీలు పట్టుపట్టారు. ఎమ్మెల్యే బయటకు రాకపోవడంతో అంగన్వాడీలు రోడ్డుమీదే కూర్చుని వెంట తెచ్చుకున్న భోజనం తిన్నారు. ఆ తర్వాత ఎమ్మల్యే ఇంటి ప్రహరీ గోడకు వినతిపత్రం అతికించి నినాదాలు చేశారు.

అనంతపురం ఎమ్మెల్యే అనంత వెంకటరామిరెడ్డి ఇంటి ఎదుటా అంగన్వాడీలు ఆందోళన నిర్వహించారు. అంగన్వాడీల నుంచి వినతిపత్రం స్వీకరించిన ఎమ్మెల్యే సమస్యను ప్రభుత్వం దృష్టికి తీసుకెళతానని చెప్పారు. అనంతపురం నగరంలోని రాప్తాడు ఎమ్మెల్యే తోపుదుర్తి ప్రకాష్‌రెడ్డి ఇంటిని అంగన్వాడీలు ముట్టడించారు.

కళ్యాణదుర్గంలో స్త్రీ, సంక్షేమశాఖ మంత్రి ఉష శ్రీచరణ్ ఇంటి ముట్టడికి అంగన్వాడీలు ప్రయత్నించడంతో పోలీసులు అడ్డుకున్నారు. కళ్యాణదుర్గం నియోజకవర్గంలోని అన్ని మండలాల నుంచి వచ్చిన అంగన్వాడీలు ర్యాలీగా మంత్రి ఇంటి ముట్టడికి యత్నించారు. అప్పటికే అక్కడికి చేరుకున్న పోలీసులు బారికేడ్లు అడ్డుపెట్టారు. అనంతరం మంత్రి ఇంటిముందు బైఠాయించి అంగన్వాడీలు నిరసన తెలిపారు.

జిల్లాలోని ఉరవకొండలోన విడపనకల్లు, కూడేరు, బెలుగుప్ప, వజ్రకరూరు, ఉరవకొండ మండలాల అంగన్వాడీ కార్యకర్తలు భారీ ర్యాలీ నిర్వహించారు. తమ సమస్యలు ప్రభుత్వం దృష్టికి తీసుకెళ్లాలంటూ టీడీపీ కార్యాలయంలో స్థానిక ఎమ్మెల్యే పయ్యావుల కేశవ్ ప్రతినిధికి వినతిపత్రం అందజేశారు. సత్యసాయి జిల్లా పెనుకొండలో మాజీమంత్రి శంకరనారాయణకు వినతిపత్రం ఇచ్చేందుకు వచ్చిన అంగన్వాడీలను పోలీసులు అడ్డుకున్నారు. ఆగ్రహించిన అంగన్వాడీలు ఎమ్మెల్యే ఇంటి ముందే బైఠాయించి నిరసన వ్యక్తం చేశారు.

కనీస వేతనం 26వేలు ఇవ్వాలని డిమాండ్ చేస్తూ అంగన్వాడీలు కడపలో ఉప ముఖ్యమంత్రి అంజాద్ బాషా క్యాంపు కార్యాలయాన్ని ముట్టడించారు. అంజాద్‌ బాషా లేకపోవడంతో రెండు గంటల పాటు అక్కడే కూర్చొని నిరసన తెలిపారు. ప్రొద్దుటూరులో వైఎస్సార్​సీపీ ఎమ్మెల్యే రాచమల్లు శివప్రసాద్ రెడ్డి ఇంటిని ముట్టడించారు. రాచమల్లు ఇంట్లో లేకపోవటంతో అంగన్వాడీ కార్యకర్తలు రోడ్డుపైనే బైఠాయించారు.

జమ్మలమడుగులో ఎమ్మెల్యే కార్యాలయానికి ముందు బైఠాయించి నినాదాలు చేశారు. కర్నూలు జిల్లా ఎమ్మిగనూరులో ఎమ్మెల్యే చెన్నకేశవ రెడ్డి ఇంటిని అంగన్వాడీలు ముట్టడించారు. ఎమ్మెల్యే ఇంట్లో లేకపోవడంతో కుటుంబ సభ్యులకు వినతి పత్రం అందజేశారు. ఆదోనిలో వైసీపీ కార్యాలయాన్ని ముట్టడించారు.

ప్రభుత్వంతో చర్చలు విఫలం కావడం వల్ల అంగన్వాడీలు ఆందోళనల ఉద్ధృతి పెంచారు. అధికారపార్టీ ఎమ్మెల్యేలు, ప్రజాప్రతినిధుల ఇళ్ల ముట్టడి తీవ్ర ఉద్రిక్తతకు దారి తీసింది. విజయవాడ ధర్నాచౌక్‌ వద్ద పెద్దఎత్తున ఆందోళనకు దిగిన అంగన్వాడీలు, ఎమ్మెల్యేలకు వినతిపత్రం ఇచ్చేందుకు వెళ్తుండగా పోలీసులు అడ్డగించారు. దీంతో ఇరువర్గాల మధ్య తోపులాట చోటుచేసుకుంది. మహిళల గాజులు పగిలి గాయాలయ్యాయి. జగ్గయ్యపేటలో ఎమ్మెల్యే ఉదయభాను ఇంటి ముట్టడికి యత్నించగా పోలీసులు అడ్డుకున్నారు. తోపులాటలో ఓ మహిళ స్పృహతప్పి పడిపోయింది.

గుంటూరు పశ్చిమ ఎమెల్యే మద్దాలి గిరి కార్యాలయాన్ని అంగన్వాడీలు ముట్టడించారు. మంగళగిరిలో వైఎస్సార్​సీపీ ఎమ్మెల్సీ మురుగుడు హనుమంతరావు నివాసం వద్ద ఆందోళన నిర్వహించారు. నరసరావుపేటలో ఎమ్మెల్యే గోపిరెడ్డి ఇంటి ముట్టడికి బయలుదేరిన అంగన్వాడీలను పోలీసులు అడ్డుకున్నారు. చీరాలలో ఎమ్మెల్యే కరణం బలరామకృష్ణమూర్తి ఇంటి వద్దకు చేరుకున్న అంగన్వాడీలను పోలీసులు నిలువరించారు. బాపట్ల బస్టాండ్‌ వద్ద అంగన్వాడీలు నల్ల బెలూన్లు ఎగురవేసి నిరసన తెలిపారు.

ఏలూరు జిల్లా చింతలపూడిలో ఎమ్మెల్యే క్యాంపు కార్యాలయాన్ని అంగన్వాడీలు ముట్టడించారు. తూర్పుగోదావరి జిల్లా అనపర్తిలో ఎమ్మెల్యే సూర్యనారాయణ రెడ్డి ఇంటి ముందు ఆందోళన నిర్వహించారు. అంగన్వాడీల సమ్మెకు మాజీ ఎమ్మెల్యే నల్లమిల్లి రామకృష్ణారెడ్డి సంఘీభావం తెలిపారు.

కోనసీమ జిల్లావ్యాప్తంగా అంగన్వాడీల ఆందోళనలు కొనసాగాయి. ముమ్మడివరం వైఎస్సార్​సీపీ పార్టీ కార్యాలయాన్ని అంగన్వాడీలు ముట్టడించారు. రావులపాలెం మండలం గోపాలపురంలో ప్రభుత్వ విప్ చిర్ల జగ్గిరెడ్డి ఇంటిని కార్యకర్తలు ముట్టడించారు. పి. గన్నవరంలో ఎమ్మెల్యే కొండేటి చిట్టిబాబు ఇంటి ముందు ధర్నాకు దిగారు.

ఉత్తరాంధ్ర జిల్లాలవ్యాప్తంగా అంగన్వాడీల ఆందోళనలు కొనసాగాయి. మంత్రుల ఇళ్లను కార్యకర్తలు ముట్టడించారు. విజయనగరం జిల్లా గరివిడిలో మంత్రి బొత్స సత్యనారాయణ క్యాంపు కార్యాలయం ముందు అంగన్వాడీలు ఆందోళనకు దిగారు. శ్రీకాకుళం జిల్లా పలాసలో మంత్రి సీదిరి అప్పలరాజు ఇంటి ముట్టడికి యత్నించగా పోలీసులు అడ్డుకున్నారు.

పోలీసులకు, అంగన్వాడీలకు మధ్య స్వల్ప తోపులాట చోటుచేసుకుంది. పెద్దపాడులో మంత్రి ధర్మాన ప్రసాదరావు ఇంటి వద్ద ఆందోళనకు దిగారు. ఆమదాలవలసలో సభాపతి కార్యాలయ వద్ద నిరసన తెలిపారు. పాతపట్నంలో ర్యాలీ నిర్వహించిన అంగన్వాడీలు ఎమ్మెల్యే రెడ్డిశాంతికి వినతిపత్రం అందజేశారు. నరసన్నపేటలో ధర్మాన కృష్ణదాసు క్యాంపు కార్యాలయం ముందు నిరసన తెలిపారు.

విజయనగరం జిల్లాలో పార్వతీపురం ఎమ్మెల్యే జోగారావు, పాలకొండలో ప్రభుత్వ విప్‌ విక్రాంత్‌ పాటిల్‌, కురుపాంలో పుష్పశ్రీవాణి, సాలూరులో ఉప ముఖ్యమంత్రి రాజన్నదొర ఇళ్లను అంగన్వాడీలు ముట్టడించారు. గజపతినగరంలో బొత్స అప్పలనర్సయ్య కార్యాలయం ముందు ధర్నాకు దిగారు.

రాజాంలో ఎమ్మెల్యే కంబాల జోగులు ఇంటిని ముట్టడించారు. బొబ్బిలిలో ఎమ్మెల్యే శంబంగి ఇంటి ముందు ధర్నా చేశారు. అనకాపల్లి జిల్లా నర్సీపట్నంలో ఎమ్మెల్యే గణేశ్ ఇంటి ముట్టడికి యత్నించగా పోలీసులు అడ్డుకున్నారు.