కరోనా నివారణపై ప్రధాని మోదీ.. ముఖ్యమంత్రులతో నిర్వహించిన సమావేశానికి రాష్ట్ర సీఎం జగన్.. తాడేపల్లిలోని క్యాంపు కార్యాలయం నుంచి వీడియో కాన్ఫరెన్స్‌లో ద్వారా పాల్గొన్నారు. ప్రధానితో సమావేశం ముగిశాక రాష్ట్ర ఉన్నతాధికారులతో సీఎం సమీక్ష సమావేశం నిర్వహించారు.
ఆ 4 రోజులు టీకా ఉత్సవ్..
కేంద్రం చెప్పినట్లు ఏప్రిల్‌ 11 నుంచి 14 వరకూ టీకా ఉత్సవ్ చేపట్టాలని సీఎం ఆదేశించారు. ఆ సమయంలో రోజుకు కనీసం 6 లక్షల మందికి వ్యాక్సిన్‌ ఇచ్చేలా చూడాలన్నారు. ఆ 4 రోజులు కనీసం 24 లక్షల మందికి వాక్సిన్‌ ఇచ్చేలా కార్యాచరణ రూపొందించాలని ఆదేశాలు జారీ చేశారు.
'కేంద్రాన్ని కోరాలి'
వ్యాక్సిన్‌ డోసులు తగినన్ని కావాలని.. ఈ విషయమై కేంద్రాన్ని కోరాలని అధికారులకు సూచించారు. ఇందుకు కేంద్ర అధికారులతో సమన్వయం చేసుకోవాలన్నారు. ఎన్నికలు ముగిసినందున.. వ్యాక్సినేషన్‌పై ప్రత్యేకంగా దృష్టిపెట్టాలని స్పష్టం చేశారు. ఈ ప్రక్రియ కోసం అన్నిరకాలుగా సిద్ధం కావాలని యంత్రాంగానికి దిశానిర్దేశం చేశారు. ప్రస్తుత వ్యాక్సినేషన్ విజయవంతమయ్యాక మరిన్ని డోసులు తెప్పించుకోవడంపై దృష్టిపెట్టాలన్నారు.
