Thugs tried to kidnap a ten year old girl: గుంటూరు జిల్లా పెదకూరపాడు మండలం జలాలుపురం గ్రామంలో.. పదేళ్ల బాలికను కిడ్నాప్ చేసేందుకు దుండగులు యత్నించారు. ముఖాలకు మంకీ క్యాప్ లు వేసుకుని వచ్చిన సదరు వ్యక్తులు.. చలిమంట కాచుకుంటున్న బాలికను పట్టుకునే ప్రయత్నం చేశారు. సదరు చిన్నారి ప్రతిఘటించడంతో రాడ్తో తలపై మోదారు. బాలిక తప్పించుకునే యత్నంలో పెద్దపెద్దగా కేకలు వేయడంతో.. ఇంట్లో ఉన్న తల్లిదండ్రులు పరిగెత్తుకొచ్చారు. దీంతో.. దుండగులు పరారయ్యారు.
గ్రామంలో తమకెవరూ శత్రువులు లేరని.. బాలికను ఎందుకు కిడ్నాప్ చేయాలనుకున్నారో అర్థంకావడం లేదని బాలిక తల్లిదండ్రులు తెలిపారు. ఘటనపై పోలీసులకు ఫిర్యాదు చేయటంతో.. సీసీ కెమెరాల ఆధారంగా నిందితులను పట్టుకునేందుకు పోలీసులు ప్రయత్నిస్తున్నారు.
కర్నూలులో 16 ఏళ్ల మైనర్ కిడ్నాప్..
కర్నూలు జిల్లా మంత్రాలయం మండలం కల్దుదేవకుంట గ్రామంలో.. 16 ఏళ్ల బాలిక నాలుగు రోజుల క్రితం అదృశ్యమైంది. తమ సమీప బంధువు కిడ్నాప్ చేసినట్లు కుటుంబ సభ్యులు మంత్రాలయం పోలీస్ స్టేషన్లో ఫిర్యాదు చేశారు. కేసు నమోదు చేసిన పోలీసులు.. దర్యాప్తు చేపట్టారు. త్వరలో కేసును చేధించి బాలికను కుటుంబ సభ్యులకు అప్పగిస్తామన్నారు. నిందితులను కఠినంగా శిక్షిస్తామని ఎస్ఐ వేణు గోపాల్ రాజ్ తెలిపారు.
ఇదీ చదవండి:
Woman Sarpanch: కనీస గౌరవం ఇవ్వడం లేదు.. మహిళా సర్పంచ్ ఆవేదన
