గుంటూరు జిల్లా కొల్లిపర మండలం దంతులూరు గ్రామానికి చెందిన వ్యక్తికి మూడు రోజుల క్రితం కరోనా పాజిటివ్ వచ్చింది. దీంతో అతడిని ఆసుపత్రికి తరలించారు. అయితే ఈ విషయాన్ని అతని తండ్రి లక్ష్మీనారాయణకు తెలియనీయలేదు. 85 ఏళ్ల వయస్సు కావటంతో.. బంధువులు విషయం చెప్పలేదు. అయితే కొడుకు ఇళ్లు సమీపంలోనే ఉండడం.. ఆ ప్రాంతాన్ని కంటైన్మెంట్ జోన్గా ప్రకటించటం.. బారికేడ్లు పెట్టడం చూసి లక్ష్మీనారాయణకు అనుమానం వచ్చింది. కుటుంబ సభ్యులను గట్టిగా అడిగితే విషయం చెప్పారు.
దీంతో లక్ష్మీనారాయణ ఒక్కసారిగా మంచంలోనే కుప్పకూలిపోయారు. బంధువులు 108కి సమాచారం ఇచ్చారు. వాహనం వచ్చి.. అంబులెన్స్ సిబ్బంది పరిక్షించేసరికే లక్ష్మీనారాయణ ఊపిరి ఆగిపోయింది. దీంతో ఆ గ్రామంలో విషాదం నెలకొంది. వెంటనే ఆయన మృతదేహానికి బంధువులు అంత్యక్రియలు నిర్వహించారు. ఆసుపత్రిలో ఉన్న కుమారుడు మాత్రం తండ్రిని కడసారి చూసుకోలేకపోయారు.
ఇదీ చదవండి: స్వదేశీ 'ఫార్మా'కు జై.. కేంద్రం మార్గదర్శకాలు!
