గుంటూరులో వలస కార్మికుల పరిస్థితి దయనీయంగా మారింది. ఎక్కడినుంచో పని కోసం వచ్చారు. దొరికిన పని చేసుకుంటూ ఇన్నాళ్లూ కడుపు నింపుకొన్నారు. ఉత్తరాంధ్ర, ఒడిశా, ప్రకాశం, కర్నూలు, కడప జిల్లాల నుంచి వచ్చిన వీరికి... లాక్‌డౌన్ శరాఘాతంగా మారింది. ఆహారం, తాగునీరు, వసతి లేక.. రహదారులనే అశ్రయిస్తున్నారు. ఎవరైనా దాతలు కాసింత తిండి తీసుకొస్తే వారి వద్దకు పరుగులు పెడుతున్నారు.
షెల్టర్లలో కొందరికి ప్రభుత్వం వసతి కల్పించినా.. మిగతావారి పరిస్థితి అగమ్యగోచరంగా మారింది. అప్పుడప్పుడూ కొందరు దాతలు, స్వచ్ఛంద సంస్థలు ఇచ్చే ఆహారమే వారికి కడుపు నింపుతోంది. స్వచ్ఛంద సంస్థలు ఇచ్చే ఆహారం, తినుబండారాలపైనా ఆంక్షల విధింపుతో... అన్నార్తుల ఆవేదన దయనీయంగా మారింది. రహదారుల పక్కన కనిపిస్తే పోలీసుల బెదిరింపులూ తోడయ్యాయి. ఎక్కడ ఉండాలి... ఈ గండం ఎలా గట్టెక్కాలో అర్థం కాని పరిస్థితి.
గుంటూరులోని మార్కెట్ సెంటర్, జిన్నా టవర్, నాజ్ సెంటర్, బస్టాండ్ ప్రాంతాల్లో బడుగుల పాట్లను.. జాయింట్ కలెక్టర్ దినేశ్ కుమార్ దృష్టికి తీసుకువెళ్లగా... ఇప్పటికే పలుచోట్ల నగరపాలక సంస్థ షెల్టర్లు కల్పించిందని గుర్తు చేశారు. వసతి, భోజన సమస్యలున్నవారిని సంక్షేమ కేంద్రాలకు తరలిస్తామని స్పష్టం చేశారు.
స్వచ్ఛంద సంస్థలిచ్చే తినుబండారాలపై ఆంక్షలు ఎత్తివేయాలని వలస కార్మికులు కోరుతున్నారు. వీరి దురవస్థను చూసి స్థానికులూ చలించిపోతున్నారు.
ఇదీ చదవండి: కరోనా ప్రభావంతో జీవనకాల కనిష్ఠానికి రూపాయి
